Alternate Text

زۆرترین بینراو

Alternate Text

گەر منداڵەکەت خواردن نه‌خوات چی دەکەیت؟

تەندروستی

بینراو 122

پێش 3 هەفتە

Alternate Text

زۆربه‌ی دایکان و باوکان رووبه‌ڕووی کێشه‌ی که‌م خواردن و که‌می ئیشتهای مناڵان ده‌بنه‌وه‌ به‌ تایبه‌ت له‌ ته‌مه‌نی ( ۲ ـــ ۸ ساڵ ) دا و نازانن چۆن مامه‌ڵه‌ له‌گه‌ڵ ئه‌م حاڵه‌ته‌دا بکه‌ن۰

 

هۆکاره‌کانی که‌می ئیشتیها له‌ مناڵاتدا دەگەڕێتەوە بۆ:

 ـــ ئازار: وه‌ک له‌ کاتی ددانی تازه‌دا ، بریندار بوونی زمان و ناو لێو به‌ هۆی ڤایرۆسه‌وه‌، ئازار و پێچی ناوسک، قه‌بزی به‌رده‌وام۰

ـــ په‌تا و هه‌ڵامه‌ت، هه‌وکردنی له‌وزه‌تێنی درێژخایه‌ن یان دووباره‌بوو، هه‌وکردنی گوێی ناوه‌ڕاست ۰

ـــ به‌ زه‌حمه‌ت پاروو قووت دان: وه‌ک گه‌وره‌بوونی له‌وزه‌تێن ، ئه‌دینوێد ۰

ـــ ترس و دڵه‌ڕاوکێ: بۆ نموونه‌ له‌ خوێندگا یان بوونی ئاژاوه‌ و ناکۆکی و شه‌ڕی نێوان دایک و باوک ۰

ـــ پێدانی خواردنێک که‌ مناڵه‌ حه‌زی لێ نه‌کات۰

ـــ خواردنی پسکیت و چپس و شیرینی و شه‌ربه‌ت و خواردنه‌وه‌ گازیه‌کان به‌ تایبه‌ت ماوه‌یه‌کی که‌م پێش ژه‌مه‌کان ۰

ـــ شێوازی هه‌ڵه‌ له‌ مامه‌ڵه‌ کردن له‌ کاتی خواردن، وه‌ک تووڕه‌ بوون له‌ مناڵ یان لێدانی بۆ ئه‌وه‌ی به‌ زۆر نان بخوات یان لۆمه‌ کردنی کاتی خواردن ۰

ــ که‌می جووڵه‌ و سستی مناڵ، به‌ هۆی زۆر سه‌یرکردنی ته‌له‌فزیۆن یان به‌کارهێنانی ئایپاد و مۆبایله‌وه‌۰

ـــ زۆر پێدانی شیر به‌ تایبه‌ت پاش ته‌مه‌نی یه‌ک ساڵ و لێ نه‌بڕینه‌وه‌ی شیر پاش دوو ساڵ له‌گه‌ڵ دره‌نگ پێدانی خواردن به‌ مناڵ ( پێویسته‌ دوای چوار مانگی شۆربا و سریلاک بدرێت به‌ مناڵ ) ۰

 ـــ شه‌ونخوونی : پێویسته‌ مناڵی ژیر ته‌مه‌ن ۱۲ ساڵ شه‌وانه‌ سه‌عات نۆ خه‌وتبێت له‌ هه‌موو وه‌رزه‌کان ۰

 ـــ گرنگی نه‌دان به‌ مناڵ و یاری نه‌کردن له‌ گه‌ڵی دا و به‌ جێ هێشتنی بۆ ماوه‌ی زۆر به‌ ته‌نها ۰

ـــ هه‌ندێ جار مناڵه‌که‌ وه‌ک شێوازێک به‌کاری دێنێت بۆ سه‌رنجڕاکێشانی دایک و باوک ۰

ــ بوونی کرمی ڕیخۆڵه‌ ، هه‌ندێ هه‌وکردنی گه‌دده‌ و ڕیخۆڵه‌کان ۰

 

 گرنگترین رێنمیایه‌کان و چۆنیه‌تی چاره‌سه‌رکردنی

ــ دوورکه‌وتنه‌وه‌ له‌ عینادی کردن له‌گه‌ڵ مناڵ تا به‌زۆر خواردن بخوات ۰

ـــ به‌ زۆری ئه‌و خواردنانه‌ی بۆ ئاماده‌ بکات که‌ حه‌زی لێ ئه‌کات به‌مه‌رجێک خۆراکی ته‌ندروست بێت ۰

ـــ ئاماده‌کردنی خواردن به‌ شێوازی سه‌رنج ڕاکێش و ڕازانده‌وه‌ی ، پێدانی خواردنی تازه‌ ۰

ـــ هاندانی مناڵ : بۆ نموونه‌ پێ بڵێ ئه‌گه‌ر بۆ هه‌فته‌یه‌ک خواردن بخوێت یاریه‌کی تازه‌ی وه‌ک پاسکیل یا بووکێکی تازه‌ت بۆ ئه‌کڕم یان ئه‌تبه‌م بۆ شوێنی یاری کردن ؛ به‌ڵام به‌ڵێنه‌که‌ت جێ به‌ جێ بکه‌ ۰

 ـــ له‌ قاپێکی گه‌وره‌ بڕێکی که‌م خواردنی بۆ تێ بکه‌، یان له‌ یه‌ک قاپ دا به‌یه‌که‌وه‌ بیخۆن۰

ـــ فێری مه‌که‌ به‌رامبه‌ر ته‌له‌فزێون و ئایپاد و مۆبایڵه‌وه‌ خواردن بخوات، به‌ڵام خۆت مۆبایل به‌کار مه‌هێنه‌ له‌ کاتی خواردن ؛ له‌ بری ئه‌وه‌ قسه‌ی خۆشی له‌گه‌ڵ دا بکه‌ ۰

 ـــ پێدانی شروبی ڤیتامین بی کۆمپلێکس و زنک و ڤیتامین دی له‌ ژێر چاودێری پزیشک ۰

ـــ به‌کار نه‌هێنانی شروبی ئیشتها به‌ بێ رێنمیایی پزیشکی پسپۆڕ ۰

 

سەرچاوە/ دکتۆر کامه‌ران رسوڵ ژاژڵه‌یی

پسپۆڕی زانستی خۆراک ئه‌ندامی کۆلیژی ئه‌مریکی بۆ زانستی خۆراک

Copyright 2019 BMC TV. All right reserved

Designed and Developed by AVESTA GROUP