کۆسرەت رەسوڵ عەلی لەپەیامێکی پیرۆزباییدا بەبۆنەی جەژنی قوربانەوە رایدەگەیەنێت لەسەر حكومەتی هەرێم و لایەنە پەیوەندیدارەكان، چارەسەری خێرا بۆ ئەم دۆخە بدۆزنەوەو چیتر هاووڵاتیان نەبنە قوربانی ئەم دۆخە قورسە.
کۆسرەت رەسوڵ عەلی سەرۆکی ئەنجومەنی باڵای سیاسی و بەرژەوەندی یەکێتی لە پەیامێکدا بڵاویکردووەتەوە، بەبۆنەی هاتنەوەی جەژنی قوربانی پیرۆز، گەرمترین پیرۆزبایی خۆم ئاراستەی موسڵمانانی جیهان و كوردستان دەكەم و هیواخوازم ئەم جەژنە پیرۆزە بكەینە جەژنی ئاشتەوایی و كۆتایی هێنان بە ململانێكان و خزمەتكردنی هاووڵاتیانمان.
روونیشیکردووەتەوە، ئەمساڵ، بەهۆی بڵاوبوونەوەی ڤایرۆسی كۆڕۆنا و ڕێنماییەكانی خۆپارێزی، ناتوانین وەك پێویست سرووتە ئاینییەكان ئەنجام بدەین، هاوكات بەداخەوە دۆخی ژیان و گوزەرانی خەڵك خراپەو ئەركە لەسەر حكومەتی هەرێم و لایەنە پەیوەندیدارەكان، چارەسەری خێرا بۆ ئەم دۆخە بدۆزنەوەو چیتر هاووڵاتیان نەبنە قوربانی ئەم دۆخە قورسە.
باسی لەوەشکردووە، جەژنی قوربانی پیرۆز بە دەرفەت دەزانم ڕوو لە سەرجەم هێزو لایەنە سیاسییەكان بكەین، لەسەر مێزی گفتوگۆ كۆببنەوەو بەڕۆحێكی كوردانەو لەپێناو پاراستنی ئەم ئەزموونە چارەسەری بنەڕەتی كێشەكان بكەن و هاوكار بن لە هەوڵدان بۆ باشتركردنی دۆخی ژیان و گوزەرانی هاووڵاتیان و كۆتایی هێنان بەململانێ سیاسییەكان و خزمەتكردنی هاووڵاتیان.