وته‌بێژی یه‌كێتی رایگه‌یاند ، بۆچوونێكی به‌هێز له‌ناو هه‌ردوو حزب هه‌یه‌ بۆ ئه‌وه‌ی زیاتر له‌یه‌كتر نزیك ببنه‌وه‌ و ئه‌وه‌ی باس ده‌كرێت له‌ راگه‌یاندنه‌كان بۆ دووركه‌وتنه‌وه‌ی یه‌كتر هیچ راست نیه‌ و گه‌وره‌ كراوه‌ته‌وه

رۆژی  سێشه‌ممه‌ چواری ئابی 2020 ئه‌مین بابا شێخ وته‌بێژی یه‌كێتی نیشتیمانی كوردستان له‌ كۆنگره‌یه‌كی رۆژنامه‌وانیدا رایگه‌یاند ، به‌مزووانه‌ كۆبوونه‌وه‌ی هاوبه‌شی یه‌كێتی و پارتی ئه‌نجام ده‌درێت ، له‌و بروایه‌دا نیم له‌یه‌كتر دووربكه‌وینه‌وه‌ ، چونكه‌ بۆچوونێكی به‌هێزهه‌یه‌ له‌ناو یه‌كێتی و پارتی كه‌ هه‌وڵدرێت له‌یه‌كتر نزیك ببینه‌وه‌ و پێكه‌وه‌ كاربكه‌ین بۆ ته‌واو كردنی ئه‌و كارانه‌ی ماوه‌ته‌وه‌  

وتیشی ، چه‌ند كۆبوونه‌وه‌یه‌ك نه‌كراوه‌ مانای ئه‌وه‌ نیه‌ له‌یه‌كتر دوور ده‌كه‌وینه‌وه‌ به‌وجۆره‌ی له‌ میدیا باس ده‌كرێت زۆر گه‌وره‌ كراوه‌  ، وه‌ك یه‌كێتی له‌ ماوه‌ی رابردوو چه‌ندین كۆبوونه‌وه‌ و راوێژمان له‌گه‌ڵ حزبه‌كانی تر ئه‌نجام داوه‌ له‌پێناو چاره‌سه‌ركردنی كێشه‌كان

وته‌بێژی یه‌كێتی ئاماژه‌ی به‌وه‌شدا ، رێكه‌وتنێكی ستراتیژی گرنگیان هه‌یه‌ له‌گه‌ڵ پارتی دیموكراتی كوردستان بۆ پێكهێنانی حكومه‌تی هه‌رێم و ئه‌گه‌ر پێویستی به‌ رێكه‌وتنی نوێ هه‌بێت ئاماده‌ن ئه‌نجامی بده‌ن