قائیمقامی قەزای ناوەندی هەولێر رایگەیاند، ١٤٢ شوێنیان داخستووە لە شاری هەولێر، بەهۆی پابەندنەبوونیان بە رێنماییە تەندروستییەکان و رێکارەکانی خۆپارێزی لە ڤایرۆسی کۆرۆنا.

نەبەز عەبدولحەمید، قائیمقامی قەزای ناوەندی هەولێر بە (BMC) راگەیاند، ئەو ١٤٢ شوێنە پێكهاتوون لە ساردەمەنی، چێشتخانە و کافتریا و شوێنی جیاواز.

قائیمقامی قەزای ناوەندی هەولێر ئەوەشی خستەڕوو، ئەو شوێنانە بۆ ماوەیەکی دیاریکراو داخراون و بڕی ملیۆنێک دیناریش سزادراون.

ئاشکراشیکرد، لەکاتی دووبارەبوونەوەی سەرپێچییەکان رێکارەکان بەرامبەریان تووندتر دەبێت، داواش لە هاونیشتمانیان و کاسبکاران دەکەین پابەندی رێنماییە تەندروستییەکان بن و بەپێی رێکارەکانی خۆپارێزی لە ڤایرۆسی کۆرۆنا، ماسک ببەستن و دەستکێش لەدەستبکەن، بۆئەوەی تەندروستی و سەلامەتیی خەڵکی شارەکە پارێزراوبێت".

لە سنووری پارێزگای هەولێر، تاوەکو ئێستا پێنج هەزار و ٤١٧ کەس تووشی ڤایرۆسی کۆرۆنا بوون، لەو ژمارەیە سێ هەزار و ٣٣٧ کەسیان چاکبوونەتەوە و ١٤٨ تووشبووش گیانیان لەدەستداوە.