خاڵس ئه‌حمه‌د قادر به‌ڕێوه‌به‌ری گشتی دیوانی وه‌زاره‌تی ته‌ندروستی حكومه‌تی هه‌رێم ئه‌مڕۆ هه‌ینی رایگه‌یاند، ڕۆژانه‌ سه‌دان نه‌خۆش ده‌چێته‌ نه‌خۆشخانه‌كان ، ئه‌وانیش هێشتا خه‌ریكی گه‌شت و سه‌یرانن و تكایه‌ ئه‌و نه‌زانیه‌ رابگرن.

خاڵس ئه‌حمه‌د قادر له‌ هه‌ژماری تایبه‌تی خۆی له‌تۆڕی كۆمه‌ڵایه‌تی فه‌یسبوك له‌ژێر ناونیشانی "تكایه‌ ئه‌و نه‌زانیه‌ ڕابگرن" نوسیویه‌تی، "له‌ نه‌خۆشخانه‌كان شوێنی نه‌خۆش نه‌ماوه‌ ، له‌هه‌مو وڵاتانی جیهان له‌كاتی بڵاوبوونه‌وه‌ی په‌تاكه‌ هه‌مو جۆره‌ گه‌شت و سه‌یران و شوێنه‌ مێژویی و گه‌شتیاریه‌كان داخران".

دەشڵێت‌، "زۆر سه‌یره‌ ئه‌و خه‌ڵكه‌ ، ڕۆژانه‌ سه‌دان نه‌خۆش ده‌چێته‌ نه‌خۆشخانه‌كان، ئه‌وانیش هێشتا خه‌ریكی گه‌شت و سه‌یرانن، دواتریش كه‌ گه‌ڕانه‌وه‌ ده‌یانه‌وێت نه‌خۆشخانه‌ و پزیشكان له‌پێشوازی و خزمه‌تیان دابن".

ئاماژەی بەوەشکردووە، تكایه‌ كه‌مێك هۆشیار بن، ئه‌گه‌ر خۆتان نه‌پارێزن كه‌س ناتوانێت بتانپارێزێت و توانای چاره‌سه‌ركردنی ئه‌و هه‌زاره‌ها نه‌خۆشه‌ نیه‌ نه‌ لێره‌ و نه‌ له‌هیچ وڵاتێكیش، كاتی په‌تا، كاتی گه‌شتوسه‌یران و تێكه‌ڵبوون نییه‌.

به‌ڕێوه‌به‌ری گشتی دیوانی ته‌ندروستی هه‌رێم له‌ په‌یامه‌كه‌یدا جه‌ختیكردوه‌ته‌وه‌،" خۆتان مه‌بنه‌ هۆكاری نه‌خۆشكه‌وتن و مردنی كه‌سوكارتانن، گله‌یی له‌خۆتان بكه‌ن ئه‌گه‌ر خۆتان ناپارێزن".