بۆ یەکەمجار لە مێژوودا، نرخی لیرەی تورکی نزمترین ئاستی تۆمارکرد و لە ئێستادا یەک دۆلاری ئەمریکی بەرامبەرە بە ٧ لیرە و ٦٧ کروش، ئەوەش نزمترینە لە مێژووی دراوی ئەو وڵاتەدا.

ئەمڕۆ سێشەممە، پێگەی دۆڤیزی تایبەت بە نرخی دراو و دراوە بیانییەکان لە تورکیا، بڵاویکردووەتەوە، نرخی لیرە نزمترین ئاستی لە بەرامبەر دۆلاردا تۆمارکردووە و لە ئێستادا ١٠٠ دۆلار بەرامبەرە بە حەوت سەد و ٦٧ لیرە.

هاوکات، بەپێی ئاژانسە ئابورييە جیهانییەکان، لە سەرەتایی ئەمساڵەوە لیرەی تورکی بە رێژەی ٢٢٪ بەهاکەی لەدەستداوە.

بەهۆی بەردەوامی کۆرۆنا و کەمبوونەوەی رێژەی گەشتیار و گرژییەکانی تورکیا لەگەڵ وڵاتانی دیکە، رۆژانە بەهای دراوی ئەو وڵاتە بەردەوامە لە نزموونەوە.