پارێزگاری سلێمانی رایگەیاند، دوای هەوڵە بەردەوامەكانمان، بەخۆشحاڵیەوە حكومەتی هەرێم بڕیاریدا بە تاپۆكردنی ٧٠٠ پارچە زەوی بۆ مامۆستایانی زانكۆی سلێمانی.

هەڤاڵ ئەبوبەکر پارێزگاری سلێمانی رایگەیاند، "دوای هەوڵە بەردەوامەکانمان لە هەمو قۆناغ و دۆخ و داخوازییە یاسایی و کاگێڕیی و تەکنیکییەکاندا، بۆ تەرخانکردن و تاپۆکردنی ٧٠٠ پارچە زەوی بۆ مامۆستایانی زانکۆی سلێمانی، بەسوپاسەوە بۆ سەرۆکی ئەنجومەنی وەزیرانی هەرێمی کوردستان و جێگری سەرۆکی ئەنجومەنی وەزیران و سەرۆکایەتیی دیوانی ئەنجومەنی وەزیران و وەزیری شارەوانیی و دەستەی وەبەرهێنان و سەرۆکایەتی زانکۆی سلێمانی و سەرۆکایەتیی شارەوانیی سلێمانی و بەڕێوەبەرێتیی گشتیی وەبەرهێنانی سلێمانی و بەڕێوەبەرێتیی ئاماری سلێمانی و بەڕێوەبەرێتیی تۆماری خانوبەرەی سلێمانی و بەشی پلان و بەدواداچونی پارێزگای سلێمانی و دەستەی نوێنەرایەتیی مامۆستایانی زانکۆی سلێمانی، بڕیاری تاپۆکردنی زەوییەکان لەلایەن سەرۆکی ئەنجومەنی وەزیرانەوە درا".

پارێزگاری سلێمانی راشیگەیاندووە، "بەناوی پارێزگای سلێمانییەوە پیرۆزبایی لە مامۆستایانی زانکۆی سلێمانی دەکەین، شاناز و ئاسودەین کە توانیمان داکۆکیکارێکی ڕاستگۆ و دڵسۆزبین لەم دۆسییەدا و بە هیممەتی هەمو لایەک ڕێکارەکان تەواوبکەین و بودجەی جیاکردنەوەی زەوییەکانیش وەک پارێزگاری سلێمانی بگرینە ئەستۆ."