نەخۆشی ئەنفلەوەنزای وەرزی ساڵانە لە وەرزی پاییز سەرهەڵدەدات ، ملیۆنان کەس لە جیهان تووش دەبن ، هەزاران کەسیش پێی دەمرن.

چەند ساڵێکە ڤاکسین دژی ئەنفلەوەنزا دروستکراوە ، لەو کەسانە دەدرێت کە پێشبینی تووشبونیان زیاترە و مەترسی لەسەر ژیانیان زیاترە وەک کەسانی سەروو تەمەنی 65  ساڵی و منداڵی بچووک و ژنی دووگیان و کەسانێک نەخۆشی دڵ و گورچیلە و ڕەبۆ و شەکرەیان هەبێ یان بەرگری لەشیان لاوازە.

ئەم ساڵ پێویستە هەموو ئەو کەسانە هەوڵی بەدەستهێنانی ڤاکسینی ئەنفلەوەنزا بدات ، تەنانەت پزیشکان و نێرس.  مانگی 10  باشترین کاتە بۆ وەرگرتنی ڤاکسینەکە ، دوای وەرگرتنی ماوەی دوو هەفتەی پێویستە تاکوو بەرگری لەش پەیدابێت دژی ئەنفلەوەنزا، تەمەنی بەرگرییەکە کەمتر لە ساڵێکە، ساڵانەش ڤایرۆسەکە شێوەی خۆی دەگۆڕێت، بۆیە پێویستە ساڵانە وەربگیرێت .

لەکاتی ئێستا کە ڤایرۆسی کۆرۆنا سەریهەڵداوە و تاکوو ئێستا ڤاکسین و دژە ڤایرۆسی نییە ، تووشبوون بە هەردوو ڤایرۆس لە هەمان کاتدا مەترسی زیاتر دەبێت، نیشانەی ئەنفلەوەنزا و کۆڤید19  لێک نزیکن و جیاناکرێنەوە، بۆیە خۆپاراستن بە ڤاکسینی ئەنفلەوەنزا پێویستیەکی هەنووکەییە.

ئامادەکردنى: د.سەردەشت طاهر، پسپۆڕی نەخۆشییەکانی هەناو