Alternate Text

زۆرترین بینراو

Alternate Text

نیشانەکانی ڕۆماتیزمی چاو کامانەن؟

تەندروستی

پێش 3 هەفتە

Alternate Text

سەدان جۆری ڕۆماتیزم هەیە و ڕەنگە هیچ ئەندامێکی جەستە نەبێت کە یەکێک لە جۆرەکانی ڕۆماتیزمە کاری لێنەکات! چونکە ڕۆماتیزم کار لە کۆلاجین دەکات و لە پێکهاتەی بەشێکی زۆری جەستەشدا کۆلاجین هەیە!

ئەم دەرکەوتانەی چاو، لەوانەیە بەهۆی ڕۆماتیزم بن:

1- وشکیی چاو: وشکیی چاو هەندێکجار بەهۆی هێرشی کۆئەندامی بەرگری دەبێت بە هەڵە بۆ سەر فرمێسکە ڕژێنەکان و تێکشاندن و لاوازکردنیان، یاخود بە ڕیوشوێنی جیاجیای دیکە فرمێسک دەردان کەمبکرێتەوە (لە نەخۆشییەکانی شۆگرن، رەقبوونی پێست و هەوکردنی ڕۆماتیدیی جومگە)

2- سۆ و هەوکردنی سپێنەی چاو: سووربوونەوەی چاو، کە هەندێکجار بە ئازارە و زۆرکات بە قەترە ئاساییەکانی دژە سووربوونەوە چاکنابێت، دەکرێ هەستیار بیت بە ڕوناکی و توانای بینین کەمببێتەوە (لە هەوکردنی ڕۆماتیدیی جومگە، هەوکرنی کڕکڕاگە و نەخۆشیی ڤێگنەر)

3- هەوکردنی بیلبیلە (رەنگینە): نیشانەکانی بریتین لە ئازاری چاو، سووربوونەوەی چاو و هەستیاریی بە ڕووناکی. هەوکردنەکە لە ڕەنگینەی چاودایە و دەکەوێتە نێوان بەشی پشتەوە (تۆڕەی چاو) و سپینەی چاو (لە ڕۆماتیزمی پشت و حەوز، ڕۆماتیزمی سەدەفی و نەخۆشیی بەهجەت)

4- گیرانی موولوولەکانی تۆڕی چاو: نیشانەکان بریتین لە تاریکبوونی چاو (هەستدەکەیت پەردەیەک بەسەر چاوتدا دادراوەتەوە)، تاریکبوونەکە زۆرکات کتوپڕە و ماوە ماوە دێت و دەڕوات، واتە چاکدەبێتەوە و ڕوودەداتەوە، هەندێکجاریش دەبێتە گرفتێکی هەمیشەیی! (لە لووپەس (گورگەسوورە)، ڕەقبوونی پێست، نەخۆشیی بەهجەت، نەخۆشیی سارکۆید و هەندێک جۆری هەوکردنی لوولەکانی خوێن کە هەموویان بە ڕۆماتیزم دادەنرێن)

5- ئاوی ڕەشی چاو: نیشانەکان بریتین لە: ئازاری چاو، تەڵخبوونی بینایی، بینینی خەرمانە بە دەوری ڕووناکیدا. بەزۆریی بەهۆی بەرزبوونەوەی فشاری ناو گۆی چاوە کە دەماری بینین دەپەستێوێت و ئەگەر چارە نەکرێت دەمارەکە لەکاردەخات و دەبێتەهۆی لەدەستدانی هەمیشەیی بینایی!  (لە ڕۆماتیزمی پشت و حەوز،ڕۆماتیزمی سەدەفی، لێکەوتەی نەخوازراوی هەندێک دەرمانی ڕۆماتیزمیی)

6- ئاوی سپیی چاو: : نیشانەکان بریتین لە: تەڵخبوونی بینین، تێکچوونی بینایی لە شەواندا، هەستکردن بە کالبونەوەی ڕەنگەکان! (لە ڕۆماتیزمی پشت و حەوز، ڕۆماتیزمی سەدەفی، لێکەوتەی نەخوازراوی هەندێک دەرمانی ڕۆماتیزمی)

......
د. سەروەر سالار چوچانی
پزیشکی پسپۆڕی جومگە و ڕۆماتیزم و فەقەرات

Copyright 2019 BMC TV. All right reserved

Designed and Developed by AVESTA GROUP