دوای رێکەوتنەکانی بەحرەین و ئیمارات لەگەڵ ئیسڕائیل بۆ ئاساییکردنەوەی پەیوەندیەکانی نێوانیان، داعش سعودیەی بە پاڵپشتی رێککەوتنەکە دانا و هەڕەشەی ئاڕاستە کرد.

ئەمڕۆ دووشەممە ١٩ی تشرینی یەکەم، ئەبو حەمزە مهاجر، وتەبێژی راگەیاندنی داعش لە تۆمارێکی دەنگیدا لەسەر تۆڕی پەیوەندی کردنی تێلیگرام بڵاویکردووەتەوە، سعودیە پاڵپشتی ئاساییکردنەوەی پەیوەندیەکانی نێوان ئیماڕات و بەحرەین لەگەڵ ئیسڕائیل کردووە و ئاسمانی بە رووی فرۆکە بازرگانیەکانی ئیسڕائیلی کردووەتەوە بۆ گەشتکردن بۆ ئیماڕات و بەحرەین.

هەر بۆیە  لەو تۆمارە دەنگییەدا  هەڕەشەی لە سعودییە کردووە، فەرمانی بە هێزەکانی داوە کە کەسانی بیانی لە وڵاتەکەدا بکەنە ئامانج و هەوڵی رووخانی ژێرخانی ئابووری وڵاتەکە بدەن.

لەگەڵ ئەوەشدا بە گوێرەی ئاژانسی رۆیتەرز، لە تۆمارە دەنگیەکەدا وتەبێژەکە دەڵێت،ئامانجەکان زۆرن، هێرش بکەنە سەر بۆرییەکانی گواستەوەی نەوت و کارگە و ئەو هۆکارانەی سەرچاوەی داهاتی حکومەتن.

هەر لە تۆمارە دەنگیەکەدا، ئەبو حەمزە مهاجر، ئاسایی کردنەوەی پەیوەندیەکانی نێوان ئیسڕائیل و بەحرەین و ئیماڕاتی بە تووندی رەتکردووەتەوە و بە ناپاکیکردن لە ئیسلام ناوی هێناوە.