دانیشتوانى گەڕەکى کانى سپیکەى سلێمانى دژى رووخاندنى خانووەکانیان لەلایەن شارەوانییەوە گردبوونەوە و داوایانکرد حکومەت بە بڕیارەکەیدا بچێتەوە.

 ئەمڕۆ بەشێک لە هاوڵاتیانى دانیشتوى گەڕەکى کانی سپیکەى شارى سلێمانى گردبوونەوەیەکیان ئەنجامدا و داوایانکرد، حکومەت بڕیارى رووخاندنى خانووەکانیان رابگرێت، یاخود قەرەبوویان بکاتەوە، دەشڵێن، دانیشتووانى ئەو گەڕەکە زۆرینەیان دەستکورت و هەژارن بۆیە پەنایان بۆ کڕینى ئەو خانووانە بردووە کە تاپۆیان نییە.

یەکێک لە بەشداربووانى گردبوونەوەکە دەڵێت، "خانووەکان بەناوى هەر کەسێکەوە تۆمارکرابێت ئەوا لایەنى پەیوەندیدار بانگهێشتى دەکات و دواتر دەستگیر دەکرێت،  بۆ ماوەى ١٣ رۆژە یەکێک لە دانیشتوانى ئەم گەڕەکە دەستگیرکراوە و شەوى رابردووش خانووەکەى روخێنراوە".

ئەو هاوڵاتیانە ئاماژەیان بەوەشکردووە، خۆیان دەزانن کە خانووەکانیان زێدەڕۆیە، بەڵام بە وتەى ئەوان، شارەوانى چاوپۆشى لە بەشێکیان دەکات و بەشێکى دیکەشیان دەڕوخێنێت، داواشدەکەن لایەنى پەیوەندیدار بە دادپەروەرى یەکسانى لەو بابەتە بڕوانێت و هەموو خانووەکان وەک یەک مامەڵەى لەگەڵدا بکرێت.

ئەوەش لە کاتێکدایە، ماوەى چەند رۆژێکە شارەوانى سلێمانى دانیشتووانى خانووە زێدەڕۆکانى گەڕەکى کانى سپیکەى ئاگادارکردووە کە خانووەکان چۆڵبکەن و شارەوانى دەست بە روخاندنیان دەکات.