بافڵ تاڵەبانی ھاوسەرۆکی
یەکێتى لە بارەگای مەکتەبی سیاسی لەگەڵ مەڵبەندی سلێمانی کۆبووەوە و رایگەیاند، نوێنەرەکانیان لەحکومەتی خۆجێیی راسپاردووە
بە گڕوتینێکی نوێوە خزمەتبکەن و کەمتەرخەمی لەھیچ کەسێک لەبەرامبەر خزمەتکردنی سلێمانی
قبوڵناکەن، وتیشى، لەمەودوا سیاسیەتی پاداشت و سزا پەیڕەودەکەن و کەسی شیاو و سەرکەوتوو
دەھێننە پێشەوە.
ئەمڕۆ لە بارەگاى
مەکتەبى سیاسى یەکێتى نیشتیمانى کوردستان لە کۆبوونەوەى بافڵ تاڵەبانى هاوسەرۆکى
یەکێتى و ئەندامانى مەکتەبى رێکخستن و بەئامادەبوونى شاڵاو عەلی عەسکەری لێپرسراوی
مەکتەبی رێکخستن و جەزا سەیدمەجید لێپرسراوی مەڵبەندی یەکی رێکخستنی سلێمانی، باس
لە رەوشى ئێستاى هەرێم و ناوچەکە کرا، هاوکات کار و بەرنامەى نوێى رێکخستنەکان و
سەرکردایەتى یەکێتیش بۆ خزمەتکردنى هاوڵاتیان و رێگریکردن لە هەر کەمتەرخەمییەک کە
لەوبوارەدا بکرێت باسیان لێوەکرا.
لەکۆبوونەوەکەدا،
لێپرسراوى مەکتەبى رێکخستن، پرۆژەی نوێکردنەوە و رێکخستنەوەی رێکخستنەکانی یەکێتی
روونکردەوە و ئاماژەی بە پرۆژە و میکانیزمی نوێکرد بۆ پێداچوونەوە بەھەیکەلی ئۆرگانەکانى
یەکێتى لەسەرئاستی مەڵبەند و کۆمیتە، بەشێوەک رێکخستنی یەکێتی لە ئاست قۆناغەکە و
خزمەتکردنی زیاتری خەڵکدا بێت.
هاوکات، جەزا سەیدمەجید
لێپرسراوی مەڵبەندی یەکی رێکخستنی سلێمانی یەکێتى ئاماژەى بەوەکرد، لەدوای کۆنگرەوە مەڵبەندێکی نوێ ھەیە و
بەبەرنامەی نوێوە خزمەت دەکەن و ھەموو ھەوڵێکیان بۆ ئەوەیە کەموکوڕییەکان و گرفتەکانى
رابردوو چارەسەربکەن و مەڵبەندی سلێمانی بکەنەوە بە مەڵبەندی خەڵک.