دەستەى دەستپاکى عێراق رایگەیاند، موچەى
سەرجەم ئەو پەرلەمانتار و بەرپرسانە رادەگیرێت کە تائێستا فۆڕمى ئاشکراکردنى
سەروەت وسامانەکەیان پڕنەکردووەتەوە.
ئاژانسى ئەلعراقیە بڵاویکردەوە، دەستەى
دەستپاکى عێراق راگرتنى موچەى ئەو بەرپرس و پەرلەمانتارانەى راگەیاندووە کە
تائێستا ئامادە نەبوون سەروەت و سامانەکەیان ئاشکرابکەن و فۆڕمى تایبەتیان بۆ ئەو
مەبەستە پڕ نەکردووەتەوە، ئەو بڕیارەش ژمارەیەک لە وەزیر و ئەندامانى پەرلەمان و
بەرپرسانى دیکەى حکومەتى فیدراڵى دەگرێتەوە و هەتا سەروەت و سامانەکانیان بۆ دەستەى
دەستپاکى عێراق ئاشکرانەکەن حکومەت موچەکانیان پێنادات.
دەستپاکى عێراق ئاماژەى بەوەشکردووە، بەهۆى
دابەزینى نرخى نەوت و کەمکردنەوەى بڕى هەناردەکەى بە پێى بڕیارەکانى ئۆپیک، لە ئێستادا
عێراق کێشەى دارایى هەیە و میزانییەى دەوڵەت کەمبووەتەوە، بۆیە پێویستە ئیدارەى
حکومەت زیاتر چاوکراوە بێت لە راگرتنى گەندەڵییەکان و بەهەدەردانى سامانى گشتى.
ئەوەش لە کاتێکدایە، لە دواى ساڵى ٢٠٠٣ وە
لەسەرجەم کابینەکانى حکومەتى عێراقدا دەستەى دەستپاکى فۆڕمى ئاشکراکردنى سەروەت و
سامان بە پەرلەمانتاران و وەزیر و بەرپرسانى حکومەت پڕدەکاتە، بەڵام ئەمجۆرە
رێکارە ئیدارى و رەقابییە لە هەرێمى کوردستان پەیڕەو ناکرێت.