مسته‌فا كازمی رایگه‌یاند،  چەند لایەن و میلیشیایەکی له‌ یاسا ده‌رچوو هه‌وڵی به‌لاڕێدابردنی خۆپیشاندانه‌كان نانەوەى پشێوی ده‌ده‌ن.

ئه‌مڕۆ سێشه‌ممه‌، مسته‌فا كازمی سەرۆکى حکومەتی فیدڕاڵی له‌ راگه‌یه‌ندراوێكدا ڕاگەیاند، " هێزە ئەمنییەکانی جێگەى ڕێزن  و به‌و په‌ڕی ئارامی و پیشه‌ییانه‌وه‌ توانیویانه‌ خۆپیشاندانی ژماره‌یه‌كی زۆری خۆپیشانده‌ران بپارێزن".

كازمی باسی له‌وه‌شكردووه‌، ژماره‌یه‌ك له‌ گروپ و میلیشیا له‌ یاسا لاده‌ره‌كان ویستوویانه‌ رێڕه‌وی ئاشتیانه‌ی خۆپیشاندانه‌كان بگۆڕن و به‌ره‌و توندوتیژی ئاراسته‌ی بكه‌ن، به‌ڵام خۆپیشانده‌ران ره‌تیانكردووه‌ته‌وه‌.

 کازمی دەشڵێت،  "هه‌ڕه‌شه‌ و مه‌ترسی گه‌وره‌ له‌ سه‌رمانه‌ و پێویسته‌ ئه‌و مه‌ترسی و هه‌ڕه‌شانه‌ بگۆڕین بۆ ده‌رفه‌تی رزگاربوون و خزمه‌تكردنی وڵات و رۆڵه‌كانی گه‌له‌كه‌مان".

 ئەمەش لە کاتێکدایە ماوەى سێ ڕۆژە و لە ساڵیادی خۆپیشاندانەکانی پارساڵدا خۆپیشاندان لە بەغدا و چەند شارێکى دیکەی باشور و ناوەڕاستی عێراق دەستیپێکردووەتەوە و نزیکەی ٢٠٠ کەس تا ئێستا برینداربوون.