دوێنێ، مەنهەل حەبوبی پارێزگاری بەغداد رایگەیاند کە دەستی لە کاركێشاوەتەوە و لە بەیاننامەیەکدا هۆکارەکەی ئاشکرا کرد، دواتر و بەبڕیارێک کەسێکی دیکە بۆ ئەو پۆستە دەستنیشانکرا.

بە گوێرەی بەیاننامەیەک کە وێنەکەی دەست BMC کەوتووە، درەنگانی شەوی رابردوو، پارێزگاری بەغداد بڕیاری دەست لەکارکێشانەوەی خۆی راگەیاندووە لە پۆستی پارێزگاری بەغداد و هۆکارەکەشی گەڕاندووتەوە بۆ ئەوەی باری تەندروستی جێگیرنییە و پێویستی بە چارەسەرە.
لە بەیاننامەکەدا هاتووە، بەهۆی تێكچوونی باری تەندروستی و پێویستبوون بە چارەسەری درێژخایەن، پارێزگاری بەغداد ناچار بووە دەستلەکاربکێشێتەوە.

بە گوێرەی بەیاننامەیەکی دیکە کە راگەیاندنی سەرۆک وەزیرانی عێراق بڵاویکردووەتەوە، دوای رەچاوکردنی بەرژەوەندی گشتی و رەزامەندی مستەفا کازمی سەرۆک وەزیرانی عێراق، بڕیاردرا بە گواستنەوەی پۆستی پارێزگاری بەغداد بۆ عەلاء کازم مەعن عیماری.
ئاماژە بەوەشکراوە، لە بەرواری دەرچونی بڕیارەکەوە وەکو پارێزگاری نوێی بەغداد دەستبەکاردەبێت.