کۆسرەت رەسوڵ، سەرۆکی ئەنجومەنی باڵای سیاسی و بەرژەوەندی یەکێتی نیشتیمانی کوردستان، بەبۆنەی کۆچی دوای قادری حاجی عەلی، پرسە و سەرەخۆشی خۆی ئاراستەی بنەماڵەکەی کرد و قادری حاجی عەلی بە هاوڕێ و هاوسەنگەری خۆی ناودەبات.
دەقی پەیامەکەی کۆسرەت رەسوڵ، سەرۆکی ئەنجومەنی باڵای سیاسی یەکێتی نیشتمانی کوردستان:
بەداخێكی زۆرەوە، بەوپەڕی نیگەرانییەوە هەواڵی كۆچی دوایی تێكۆشەری گەورەی گەلەكەمان، سیاسەتمەدارو پێشمەرگەی دێرین و قارەمانی ڕۆژانی سەختی خەبات، هاوڕێ و هاوسەنگەرم كاك قادری حاجی عەلی-م بیست.
كاك قادری حاجی عەلی یەكێك لە تێكۆشەرە گەورەكانی گەلەكەمان بوو، لە خانەوادەیەكی نیشتمانپەروەر گەورە بوو، لە خەباتی شاخ وەك پێشمەرگەیەكی ئازاو قارەمان بەشداری لە دەیان داستان و نەبەردی كردووە.
لەدوای ڕاپەرین و ئازادكردنی كوردستان وەك ئەندامی مەكتەبی سیاسی یەكێتی نیشتمانی كوردستان خەباتی كرد، یەكێك بوو لەو هەڤاڵە دڵسۆزانەی هەمیشە بە دڵسۆزی و لەخۆبردووییەوە كاری دەكرد، ئامانجی خزمەتكردنی خەڵك بوو، خەباتی دەكرد لەپێناو كوردو كوردستان.
كاك قادری حاجی عەلی هەمیشە یەكێك بووە لە هاوڕێ بە ئەمەك و وەفاكان، لە نێو شارو لە خەباتی نهێنیدا وەك تێكۆشەرێكی ئازاو قارەمان خەباتی دەكرد، هەمیشەو لە هەموو قۆناغە جیاوازەكاندا لە هەر ئەرك و لێپرسراویەتییەك كە پێی سپێردرابێ بەوپەڕی دڵسۆزی و لەخۆبردووییەوە جێبەجێی كردووە و كارەكانی ڕاپەڕاندووە.
بەداخەوە بۆ لەدەستدانی ئەو كەڵەپیاوە جوامێرو تێكۆشەرە، كۆچی دوایی هەڤاڵ قادری حاجی عەلی خەمێكی یەكجار قووڵەو هەموومان نیگەرانین بۆی، داواكارم لە خوای گەورە لەم كۆستە گەورەیە سەبووری هەموومان بدات و كۆچكردوو جێگای بەهەشتی بەرین بێت.
كۆسرەت ڕەسول عەلی
سەرۆكی ئەنجومەنی باڵای سیاسی و بەرژەوەندی
یەكێتی نیشتمانی كوردستان