ژووری ئۆپەراسیۆنی پارێزگای هەولێر بۆ بەڕەنگاربوونەوەی ڤایرۆسی
كۆرۆنا دوای کۆبوونەوەی، چەند بڕیارێكی لەبارەی پابەند بوون بەڕێنماییە
تەندروستیەكان و پاراستنی هاوڵاتیانەوە دەركرد.
بریارەكانی ژووری ئۆپەراسیۆنەكانی پارێزگای هەولێر بریتین لە :
یەكەم/ ژووری ئۆپەراسیۆنی
پارێزگای هەولێر بۆ بەرەنگاربوونەوەی ڤایرۆسی كۆرۆنا، سوپاس و ستایشی دانیشتوانی
سنووری پارێزگای هەولێر دەكات كە لەماوەی دووهەفتەی ڕابردوو بەهۆی پابەندبوونیان
بەڕێنماییە تەندروستییەكان و ڕێكارەكانی خۆپارێزی، تاڕادەیەك توانراوە لە سنووری
پارێزگاكەمان بەشێوەیەك ڕێژەی تووشبوون بەكۆرۆنا كەمبێتەوە، ئەمەش ماییە
خۆشحاڵییە، بۆیە تكا لەهاوڵاتییانی شارەكەمان دەكەین پابەندی بڕیار و ڕێنماییە
تەندروستیی و ڕێكارەكانی خۆپارێزیبن و زۆرهەستیارانە مامەڵە بكەن و خۆیان
بەدووربگرن لە شوێنە قەرەباڵغەكان و دەمامك ببەستن، لەپێناو پاراستنی ئاسایشی
تەندروستیی شارەكەمان و سەلامەتی گیانی هاوڵاتییان ، هەروەها سوپاس و ستایشی
یەكەكارگێڕییەكان، تیمەكانی تەندروستیی، شارەوانییەكان، هێزەكانی(پۆلیس، ئاسایش،
زێرەڤانی، هاتووچۆ) دەكەین، كە جوامێرانە لەپێناو پاراستنی ئاسایشی تەندروستی
شارەكەمان و جێبەجێكردنی ڕێكارەكانی خۆپارێزی لە كۆرۆنا و سەلامەتی گیانی
هاوڵاتییانی شارەكەمان لەئەركدابوونە.
دووەم/ داوا لەسەرجەم
هاوڵاتییانی سنووری پارێزگای هەولێر دەكەین، بەو پەڕی هەستكردن بەبەرپرسیاریەتی
لەم بارودۆخەدا، لەپێناو سەلامەتی خۆیان و ئازیزانییان پابەندبن بەڕێنماییە
تەندروستییەكان و ڕێكارەكانی خۆپارێزی لەكۆرۆنا بەتایبەتی بەستنی (دەمامك)،
هەركەسێك ڕەچاووی بەستنی (دەمامك) و ڕێكارەكانی خۆپارێزی لەڤایرۆسی كۆرۆنا نەكات،
ڕووبەڕووی ڕێكاری یاسایی دەبێتەوە.
دووەم/ داوا لەمامۆستایانی
ئاینی و پێشنوێژی مزگەوتەكان دەكەین، لەجێبەجێكردنی ڕێنماییە تەندروستییەكان و
ڕێكارەكانی خۆپارێزی هاوكارمانبن:-
1- بەهیچ شێوەیەك نوێژخوێن نابێت
منداڵ لەگەڵ خۆی ببات بۆ ناو مزگەوت.
2- ڕێگە نەدەن نوێژخوێن بەهیچ
شێوەیەك بەبێ بەستنی (دەمامك) و بەرماڵی تایبەتی خۆی بۆ نوێژكردن بڕواتە ناو
مزگەوت.
هەر مزگەوتێك پابەند نەبێت،
بەپێی ئەو دەسەڵاتەی پێماندراوە دادەخرێت.
سێیەم/ (نۆڕینگە، سەنتەر و
كۆمەڵگا پزیشكییەكان، نەخۆشخانە ئەهلییەكان) و هەموو ئەو هاوڵاتییانەشی بەمەبەستی
چارەسەر سەردانیان دەكەن، دەبێت پابەندی جێبەجێكردنی ڕێنماییە تەندروستییەكان و
ڕێكارەكانی خۆپارێزی لەكۆرۆنابن، بەتایبەتی بەستنی (دەمامك)، هەرشوێنك پابەند
نەبێ، ڕێكاری یاسیایی لەبەرمبەردا دەگیرێتەبەر و شوێنەكە بە پێبژاردن و داخستن
سزادەدرێت.
چوارەم/ هەموو ئەو شوێنانەی
كراوەن، (مۆڵ، ماركێت، شوێنە بازرگانیەكان، بازار، چێشتخانە)، پێویستە تەواوی
مەرجە تەندروستییەكان و ڕێكارەكانی خۆپارێزی جێبەجێبكەن لەبەستنی (دەمامك، دووری
مەودای نێوان هاوڵاتییان، دروست نەكردنی قەرەباڵغی، دانانی هێمای نۆرەی هاوڵاتییان
لەسەر زەوی بەتایبەتی لای كاشیرەی مۆڵ و ماركێتەكان و پێشوازی هوتێل و موتێلەكان)،
هەرشوێنێك ئەم رێنماییانە بەتایبەتی بەستنی(دەمامك)جێبەجێنەكات، لێژنەی
قایمقامیەتەكان، تیمەكانی تەندروستی، شارەوانی، چاودێری بازاڕ، هێزە ئەمنییەكان
ڕاسپێردراون، دەستبەجێ شوێنەكە دادەخەن.
پێنجەم/ (پێشانگاكانی
ئۆتۆمۆبێل، بازاڕە میللیەكان، گۆڕەپانەكانی باڵندە، هاوینە هەوارەكان، شوێنە
گەشتیاریی و گەشتیارەكانیان) دەبێت ڕەچاووی ڕێنماییە تەندروستییەكان و ڕێكارەكانی
خۆپارێزی بكەن و پابەندبن بە بەستنی(دەمامك)، هەرشوێنك پابەند نەبێت، ڕێكاریی
یاسایی لەبەرامبەردا دەگیرێتەبەر.
شەشەم/ بۆچاودێریكردن و
جێبەجێكردنی ڕێنماییە تەندروستییەكان و ڕێكارەكانی خۆپارێزی لەكۆرۆنا لەشوێنە
گشتییەكانی(كۆمەڵگا، قەزا، ناحییەكان)ی سنووری پارێزگای هەولێر، مەفرەزەی گەڕۆك
لەهێزە ئەمنیەكان پێكهێنراوە، هەر كەس و لایەنێك پابەند نەبێت ڕێكاری یاسایی
لەبەرامبەردا دەگێرێتەبەر.
حەوتەم/ هۆشداری دەدەینە
سەرجەم شۆفێرانی (تەكسی، تایبەت، پاس، مینی پاس) پابەندی ڕێنماییە
تەندروستییەكانبن و خۆیان و سەرنشینەكانیان (دەمامك) ببەستن، هەر كەسێك سەرپێچی
لەم بڕیارە بكات، لەلایەن پۆلیسی هاتووچۆ ڕێكاریی یاسایی لەبەرامبەردا دەگیرێتەبەر
بەپێبژردن و دەستبەسەرداگرتنی ئۆتۆمبێلەكەی.
هەشتەم/ ئەم شوێنانە بەداخراوی
دەمێنەوە:- (هۆڵەكانی بووك گواستنەوە، هەموو جۆرە گردبوونەوە و كۆنفرانس و
كۆبوونەوەیەك).
نۆیەم/ ئەم شوێنانە لەكاتژمێر
(12)ی شەو دادەخرێن:- (یانەی شەوانە، نێرگەلەكێشان، یانەكانی مەی خواردنەوە (بار)،
لایف موزیك، ئاهەنگی شەوانەی یانەكان)
دەیەم/ (پرسەدانان
لە(هۆڵ-ماڵ-ژێرخێوەت)، مەراسیمی سەرقەبران) قەدەغەیە، بنكەی پۆلیس و موختاری گەڕەك
بەرپرسیارن، هەركەسێك پابەندنەبێت، بەپێی بەیانی ژمارە (52)ی ساڵی 2020ی وەزارەتی
ناوخۆی حكومەتی هەرێمی كوردستان، ڕێكاریی یاسایی لەبەرامبەردا دەگیرێتەبەر.
یانزدەیەم/ سەرجەم بازگەكانی
سنووری پارێزگای هەولێر ئاگادار دەكەینەوە، ڕێگە بەهیچ گروپێكی گەشتییاری و كەسێك
نادرێت بەبێ بەستانی (دەمامك) داخڵی سنووری پارێزگای هەولێر بێت، بەپێچەوانەوە
ڕێكاری یاسایی لەبەرامبەر كۆمپانیا گەشتیارییەكان دەگیرێتەبەر.
سێزدەیەم/ سەرجەم فەرمانبەرانی
فەرمانگەكان دەبێت (دەمامك) ببەستن، هەر فەرمانبەرێك لە كاتی دەوام (دەمامك)ی
نەبەستابێت رێكاری كارگێری بەرامبەری دەگیرێتە بەر، هیچ هاوڵاتییەك و موراجعێك بۆ
ڕاییكردنی مامەڵەكانییان بەبێ بەستنی (دەمامك) بۆی نییە بچێتە ناو هیچ
فەرمانگەیەك، بە پێچەوانەوە بەرپرسی فەرمانگەكە ڕوو بەڕووی ڕێكاری یاسایی دەبێتەوە.
ژووری ئۆپەراسیۆنی پارێزگای
هەولێر