جێگری سەرۆکی ئەنجومەنی نوێنەران رایگەیاند، مستەفا کازمی بەڵێنداوە کێشەی مووچەی فەرمانبەران و شایستە داراییەکانی جوتیارانی هەرێم چارەسەر بکات.
ئەمڕۆ پێنجشەممە، بەشیر حەداد، جێگری سەرۆکی ئەنجومەنی نوێنەران لە پاش مەراسیمی پرسەی پەرلەمانتارێکی عێراق رایگەیاند، چاومان بە مستەفا کازمی سەرۆک وەزیرانی عێراق کەوتووە و بەڵێنیداوە کیشەی مووچەی فەرمانبەران و شایستە داراییەکانی جوتیارانی هەرێم چارەسەر بکات و زێڕیش لە رێگەی فڕۆکەخانەکانی هەرێمەوە هەناردە بکرێت.
راشیگەیاند، کازمی پێیوایە کە ئەو شایستە داراییانەی حکومەتی ناوەند بۆ فەرمانبەرانی هەرێمی دەنێرێت زۆر لە شایستەکانی خۆی کەمترە و کەسانێک هەن دەیانەوێت کۆسپ بخەنە بەردەم کارەکانی حکومەتی ناوەند.
ناوبراو ئاماژەی بەوەشکرد، کازمی گرنگی رۆڵی پەرلەمان لە پاڵپشتیکردنی رێکەوتنی نێوان هەولێر و بەغدادی دووپاتکردەوە.