Alternate Text

زۆرترین بینراو

Alternate Text

قوباد تاڵەبانی: نابێ ناكۆكییە سیاسییەکانمان بەسەر ئامانجە نەگۆڕەكانماندا زاڵبێت

کوردستان

پێش 3 هەفتە

Alternate Text

قوباد تاڵەبانی رایگەیاند، نابێ رێگە بدەین ناكۆكییە سیاسی و حیزبی و دەستەگەرییەكانمان زاڵ بن بەسەر ئامانجە نەگۆڕەكانمان.
ئەمڕۆ پێنجشەممە، ٣١ی کانونی یەکەم، قوباد تاڵەبانی، جێگری سەرۆکی حکومەتی هەرێم رایگەیاند: ئێمە لە حكومەتی هەرێمی كوردستان بە گشتی و تیمی دانووستانكار لەگەڵ بەغدا، درێغی ناكەین و لە كار و كۆشش بەردەوام دەبین بۆ زاڵبوون بەسەریاندا.

ناوبراو راشیگەیاند، لە ماوەی رابردوودا لە بەغدا زۆر هەنگاو چووینە پێشەوە، زۆر كاریترمان ماوە لەم دۆسیەدا تا بگەینە دابینكردنی شایستە داراییەكانی خەڵكی كوردستان و چارەسەرکردنی کێشە هەڵپەسێردراوەکانیتری نێوان هەرێم و حکومەتی فیدرال، لە نێویاندا کۆتاییهێنان بە سەرهەڵدانەوەی تەعریب لە کەرکوک و هەموو ناوچە جێناکۆکەکان، هەروەها بەدەستهێنانی مافی جوتیارانی کوردستان و یەکلاییکردنەوەی چارەنووسی هێزی پێشمەرگەی کوردستان لە چوارچێوەی سیستمی بەرگری عیراقدا.

قوباد تاڵەبانی، جێگری سەرۆکی حکومەتی هەرێم بەبۆنەی هاتنی ساڵی نوێی زانینییەوە پەیامێکی پیرۆزبایی بڵاوکردەوە و ئەمەش دەقەکەیەتی ...
كۆمەڵانی خەڵكی كوردستان، پێکەوە ساڵێكی دژوار و سەختی دارایی و تەندروستیمان بەڕێكرد، وا لە دەسپێكی ساڵێكی نوێداین؛ 2021، كە ئەویش كاریگەرە بە لێكەوتەكانی كۆرۆنا لەگەڵ كێشە و گرێ و گرفتەکانی نێوان هەرێم و بەغدا، نیوەی یەكەمی ساڵی نوێ هەستیارییەكیتری لە هەناودایە كە وەرزی هەڵبژاردنی چاوەڕوانكراو و بەرزبوونەوەی تای كێبەركێ و ململانێی سیاسی و كەسی و تەنانەت تایفی و نەتەوەییەكانیشە لەسەر ئاستێکی فراوان. ئەمە لەكاتێكدایە خەڵكی كوردستان و هەموو عێراق بە گشتی خۆیان هیلاك و ماندووی دۆخی دارایی و ترس و دڵەڕاوكێی ئایندەی خۆیان و خێزانەكانیانن.
گەلی ئێمە مێژوویەكی درێژ و یادەوەری تفت و تاڵی زۆری هەیە لەگەڵ قەیران. لە هەمان كاتیشدا پێشینەی پشوودرێژی و ئازایەتییەکی بێوێنەی هەیە لە تێپەڕاندنی ناخۆشییەكان و سەركەوتن بەسەر تەنگ و چەڵەمەكان. هەوێنی ئەم سەركەوتنانەشی بە پلەی یەكەم لە یەكڕیزی و گیانی لە خۆبردوویی و هاوكاریكردنی یەكتردا بووە، بە تایبەت ئەو كاتانەی یەخانگیری مەترسییەكان بووە. بۆ ئەم ساڵەشی كە دادێت لە هەموو كات زیاتر پێویستمان بە ژیاندنەوەی ئەم گیانە هەیە لەسەر ئاستی تاك و كۆمەڵ. نابێ رێگە بدەین ناكۆكییە سیاسی و حیزبی و دەستەگەرییەكانمان زاڵ بن بەسەر ئامانجە نەگۆڕەكانمان، لە پێش هەموویەوە پاراستنی خەڵك و خاك و قەوارەی هەرێمی كوردستان لە هەر مەترسییەك كە دەشێت لە هەر ئان و ساتێكدا سەرهەڵبدات.
هەوڵدان بۆ تەبایی و دروستكردنی كۆدەنگی ئەرکی سەر شانی هەموومانە. پێویستە هەر کەس و لایەنێک لای خۆیەوە لەپێناو بەرژەوەندی گشتیدا گەورەیی بنوێنێت و لە بەشێک لە بەرژەوەندییە کەسیی و حیزبییەکان خۆش بێت. بۆ ئەم مەبەستەش هیوامان بە چاكەخواز و خەمخۆرانی میللەتی خۆمان زۆرە و چاوەڕوانین هەر کەس و لایەنێک لەلایەن خۆیەوە دەستپێشخەربێت و هەنگاو بنێت.
ئەوەشی پەیوەندی بە روبەڕووبوونەوەی قەیرانەكانەوە هەیە، ئێمە لە حكومەتی هەرێمی كوردستان بە گشتی و تیمی دانووستانكار لەگەڵ بەغدا، درێغی ناكەین و لە كار و كۆشش بەردەوام دەبین بۆ زاڵبوون بەسەریاندا. لە ماوەی رابردوودا لە بەغدا زۆر هەنگاو چووینە پێشەوە، زۆر كاریترمان ماوە لەم دۆسیەدا تا بگەینە دابینكردنی شایستە داراییەكانی خەڵكی كوردستان و چارەسەرکردنی کێشە هەڵپەسێردراوەکانیتری نێوان هەرێم و حکومەتی فیدرال، لە نێویاندا کۆتاییهێنان بە سەرهەڵدانەوەی تەعریب لە کەرکوک و هەموو ناوچە جێناکۆکەکان، هەروەها بەدەستهێنانی مافی جوتیارانی کوردستان و یەکلاییکردنەوەی چارەنووسی هێزی پێشمەرگەی کوردستان لە چوارچێوەی سیستمی بەرگری عیراقدا.
لە هەمان کاتدا ئەرکی هێزە سیاسییەکانە کە هەوڵ بدەن فراکسیۆنە کوردستانییەکان لە بەغدا یەکگرتووتر بن لە پێناو خێراترکردنی چاکسازی و هەروەها لە پێناو بەڕێوەبردنێکی باشتر و شایستەتر بۆ هەموو عیراقییەکان بە دانیشتوانی هەرێمی کوردستانیشەوە. دەبێت بە کردار ئەو تێڕوانینە هەڵەیە بسڕینەوە کە حکومەت و دەسەڵاتدارانی کوردستان تەنها هەرێمی کوردستانیان بەلاوە گرنگە و بەشەکانی تری عیراق پشتگوێ دەخەن. کوردستانێکی بەهێز بە بەشدارییەکی کارا و بەهێز لە عیراقێکی بەهێزدا دێتە دی. بەڵام کوردستان هەرگیز ناتوانێت ئەو کاریگەرییەی هەبێت ئەگەر لەناو ماڵی خۆماندا تەبا نەبین. تەباییش بە سەپاندنی ئیرادەی زۆرینە نایەتە دی، و بە پەیڕەوکردنی سیاسەت و رق و کینە لە دژی یەکتری دروست نابێت. تەبایی بە رێکەوتن لەسەر خاڵە ستراتیژییەکان لە لایەکەوە و بە پەیڕەکردنی کێبەرکێیەکی سیاسی تەندروست لەلایەکەیترەوە دروست دەبێت کە دوور بێت لە شکاندنی کەسایەتی یەکتر و دوور بێت لە تەشهیر کردن بە رەمزەکانی یەکتر. مەترسییەکانی بەردەممان وادەخوازن کە دووربینانە بیربکەینەوە و لە ئێستاوە بکەوینە کاری جدی.
سەرباری لەمپەر و كەشی ئاڵۆز و قورسایی دانوستاندنەکانمان لەگەڵ بەغداد، گەشبینین و چاوەڕێ دەکەین بە پەرەپێدانی هەوڵەكانمان لەماوەی داهاتوویەکی نزیکدا بەرەو دەستکەوتی گەورە بۆ عێراق بە گشتی و هەرێمی کوردستان بە تایبەت هەنگاو بنێین.
لەپاش هەموو ناخۆشییەك نۆرەی خۆشییە و تونێلەكە چەندە درێژ و تاریک بووبێت، ڕووناكی لە كۆتاییەكەیدا دیارە. هیوا و باوەڕی زاڵی ئێمەش ئەوەیە لەگەڵ 2020 دا ماڵئاوایی بكەین لە ترسناكییەكانی بەشێكی زۆر لەو كێشە و قەیرانانەی ژیانیان لێ تێكداین، لە پێش هەموویانەوە كۆرۆنا و بۆ قەیرانەكانی دیکەش باوەڕمان بەكار و پێداگریمان هەیە لەسەر هەوڵی چارەسەركردنیان.
بە هیوای ساڵێكی خۆشتر و باشتر بۆ هەموولایەك و هەموو ساڵێك هەر شاد و سەربەرز و سەرکەوتوو بن.

Copyright 2019 BMC TV. All right reserved

Designed and Developed by AVESTA GROUP