لە چوارچێوەی بەرنامەی حکومەت بۆ چاکسازی و زیادکردنی داهات، حکومەتی هەرێم ١١ بڕیاری نوێی لەبارەی رێکخستنەوەی باجی دەرکرد، گرنگترینیان دانانی 20%ی باج لەسەر کۆمپانیاکانی ئینتەرنێت و گەیاندنە.

بە گوێرەی نوسراوێکی حکومەتی هەرێمی کوردستان کە کۆپییەکی دەستی BMC کەوتووە، حکومەتی هەرێم بڕیاریداوە بە دانانی ٢٠٪ی باج لەسەر کۆمپانیاکانی ئینتەرنێت و گەیاندن، لێبڕینی راستەوخۆی باجی دەرامەت لەسەر کارمەندانی کەرتی تایبەت، پابەندکردنی کۆمپانیاکانی سکیوریتی نەوت و گاز بە پێدانی باج، دیاریکردنی میکانیزمی گونجاو بۆ وەرگرتنی باجی ئۆتۆمبێلی تایبەت، وەرگرتنی باج لە میوانخانە و چێشتخانەکانی چوار ئەستێرە بەسەرەوە.
هاوکات، بڕیاردراوە بە وەرگرتنی باجی شایستە لە بواری ریکلام لە کەرتەکانی گشتی و تایبەت و دانانی لێدانی ستیکەر لەسەر مەوادەکانی جگەرە و کحول و ماوەی دوو مانگیش بۆ جێبەجێکردنی ئەو بڕیارانە دیاریکراوە

کەمال تەیب، بەڕێوەبەری گشتیی باج و خانووبەرەی میری لە هەرێم رایگەیاند، بە مەبەستی جێبەجێکردنی چاکسازی و رێکخستنەوەی داهاتی نێوخۆیی، حکومەتی هەرێم چەندین بڕیاری چارەنووسسازی داوە بۆ ئەوەی کۆمپانیا گەورەکان بێنە ژێر بڕیاری دانی باج لە هەرێمی کوردستان بەپێی یاسا و رێنماییەکان.

ناوبراو راشیگەیاند، بڕیارەکان دەربارەی جێبەجێکردنی باجە لەسەر کۆمپانیاکانی گەیاندن، ئینتەرنێت، نەوتی و تەواوی ئەو کۆمپانیایانەی دیکە کە بەپێی یاسا و رێنماییەکان پێویستە باج بدەن.