قائیمقامییەتی سلێمانی رایگەیاند، بەهۆی پابەندنەبون بەمەرجەکانی تەندروستی و رێنماییەکانی دیکەی کارکردن، کۆگایەکی ئامادەکردنی خواردەمەنی لە گەڕەکی ئازادی دادەخرا.
ئەمڕۆ پێنجشەممە، ١٤ی کانونی دووەم، قائیمقامییەتی سلێمانی لە راگەیاندراوێکدا بڵاویکردووەتەوە، لەهەڵمەتێکی بەرفراوانی لیژنە هاوبەشەکانی قائیمقامیەتی سلێمانی بۆ دوکان و بازاڕ و شوێنە گشتییەکانی گەڕەکی ئازادی، بەهۆی پابەندنەبون بەمەرجەکانی تەندروستی و رێنماییەکانی دیکەی کارکردن، کۆگایەکی ئامادەکردنی خواردەمەنی دادەخرا.
ئاماژە بەوەشکراوە، کۆگاکە خواردەمەنی بۆ ئەو دەستگێڕانەی لەسەر چیای گۆیژە ئامادەکردووە کە بەشێوەی دەستگێڕ و عەرەبانە خواردەمەنی دەفرۆشن.
هاوکات، شۆڕش کەمال، نوێنەری بەرێوەبەرایەتی ڤێتێرنەری لە لیژنەکانی قائیمقامیەتی سلێمانی رایگەیاند،" داوا لە هاوڵاتیان دەکەم لەخواردنی دەستگێڕ و عەرەبانەکان دوربکەونەوە، چونکە کۆگاکانی ئامادەکردنی خواردەمەنییەکانیان مەرجەکانی تەندروستی و ڤێتێرنەری و رێنماییەکانی دیکەی کارکردن جێبەجێ ناکەن.