وەزارەتی دارایی و ئابووری هەرێم رایگەیاند، بڵاوکردنەوەی دەنگۆی لێخۆشبوونی
رەسمی گومرکی بۆ (کۆمپانیای خۆشناو) لە لایەن وەزیری داراییەوە درۆیە و هیچ
پەیوەندییەکی بە راستییەوە نییە.
ئەمڕۆ سێشەممە، ١٩ی
کانوونی دووەم، وەزارەتی دارایی و ئابووری هەرێم لە
راگەیەندراوێکدا بڵاویکردووەتەوە، ماوەیەكە هەندێك، پەیج و سایتی درۆزن كە بە
پارەی حەرام درووستكراون، چەند درۆ و بوختان و چەواشەكارییەكیان بڵاوكردووەتەوە كە
گوایە وەزیری دارایی بە نایاسایی لێخۆشبوونی رەسمی گومركی بۆ (كۆمپانیای خۆشناو) دەركردووە. ئەمە درۆیە و هیچ پەیوەندییەكی بە ڕاستیەوە نییە.
دەقی راگەیاندراوەکە:
ڕوونكردنەوەیەك لە
وەزارەتی دارایی و ئابورییەوە بۆ ڕای گشتی
ماوەیەكە هەندێك، پەیج و سایتی درۆزن
كە بە پارەی حەرام درووستكراون، چەند درۆ و بوختان و چەواشەكارییەكان بڵاوكردۆتەوە
كە گوایە وەزیری دارایی بە نایاسایی لێخۆشبوونی رەسمی گومركی بۆ (كۆمپانیای خۆشناو)
كردووە.
ئەمە درۆیە و هیچ پەیوەندییەكی بە ڕاستییەوە نییە، بۆ ئاشكراكردنی
راستیەكان بۆ كۆتایی هێنان بە درۆ و بوختان و چەواشەكارییەكانیان بە گرنگمان زانی
ئەم راستیانە بۆ ڕای گشتی بڵاو بكەینەوە:-
1-دوای رەزامەندی ئەنجومەنی وەزیران و وەزارەتی
كشتوكاڵ و دەستەی وەبەرهێنان كۆمپانیای خۆشناو (پرۆژەی بە بازاڕكردنی گەنمی
جووتیاران)ی وەرگرتووە، كە پێكدێت لە درووستكردنی 60 سایلۆ و چەندین كارگەی ئارد،
بڕوێش، گەنمەكوتاو، بنەتۆ، مەعكەرۆنی، سپارگێتی، كێك و سلیلاك و ئالیك) چەند
پێكهاتەیەكی دیكە.
2-وەزارەتی دارایی و ئابوری هیچ پەیوەندییەكی بە
گرێبەست و دیزاین و پێداویستیەكانی دیكەی پرۆژەكە (چیمەنتۆ، شیش، پلیت...هتد) نییە.
3-لێخۆشبوونی رەسمی گومركی بە پێی یاسایی
ژمارە (4)ی 2006 ماددەی (5) و بڕگەی شەشەم ڕەزامەندی بۆ كراوە و هیچ پەیوەندی بە
وازارەتی داراییەوە نییە.
4-وەزیری دارایی مافی
لێخۆشبوونی رەسمی گومركی بۆ هیچ كەس و لایەن و كۆمپانیایەك نییە و نەیكردووە.
5-هەموو داتاكان بڕی (شیش، چیمەنۆ) لە هاندانی
وەبەرهێنانەوە بە نووسراوی فەرمی بە مۆری فەرمی راستاندنی بۆ كراوە و رەوانەی وەزارەتی
دارایی كراوە، بۆیە زیادكردنی درۆیەكی شاخدارە.
6- بە پێی پسوولەی گومركی هاوپێچ تاوەكو ئەمرۆ لە
كۆی 47452 هەزار تۆن، تەنیا 2375 تۆن شیش هاتووە و هیچ بڕە چیمەنتۆ و پلێتێك
نەهاتووە.
7-سكاڵاكردن لە دادگا مافێكی
پارێزراوی وەزیر و وەزارەتی دارایی و ئابورییە. هاوپێچ: تێكڕای وردەكارییەكانی پرۆژەكە و رەزامەندییەكانیان.