ئەندامێکی ئەنجومەنی سەرکردایەتی
کەرکوک-گەرمیانی پارتی رایگەیاند، پارتی بڕیاریداوە لەکەرکوک بەشداری لە هەڵبژاردنەکانی داهاتووی
پەرلەمانی عێراق بکات و ئامادەی بەشداریکردنن لە دروستکردنی
هاوپەیمانییەتی کوردستانی.
ئەمڕۆ شەممە، ١٣ی شوباتی ٢٠٢١، عەدنان کەرکوکی، ئەندامی ئەنجومەنی
سەرکردایەتی کەرکوک-گەرمیانی پارتی بە BMC راگەیاند:"پارتی
ئامادەکاری بۆ بەشداریکردن لە هەڵبژاردنی داهاتووی پەرلەمانی عیراق لە کەرکوک دەستپێکردووە،
بەڵام ئەو پرسەش لەسەر بارودۆخەکە دەمێنێتەوە، پارتی نایەوێت بەم دۆخەی
ئێستا بگەڕێتەوە شارەکە".
ناوبراو راشیگەیاند:"تاوەکو ئێستا لایەنە کوردستانییەکانی کەرکوک
تەنها گفتوگۆیان لەبارەی دروستکردنی هاوپەیمانییەتی لەهەڵبژاردنی داهاتووی پەرلەمانی
عێراق کردووە و نەگەیشتوونەتە بڕیاری کۆتایی، ئێمەش ئامادەی بەشداریکردنین لە دروستکردنی هاوپەیمانییەتی کوردستانی، بەڵام پێویستە لەبارەی ژمارەی کاندیدەکان رێککەوتن بکرێت، چونکە
ئەگەر ژمارەی کاندیدەکان زۆربێت دەنگەکان پرش و بڵاو دەبن".
سەبارەت بە رادەستکردنەوەی بارەگاکانی پارتی لەکەرکوک و گەڕانەوەیان بۆ
شارەکە ئەو بەرپرسەی پارتی ئاماژەی بەوەکرد:" لە مانگی تشرینی یەکەمی ساڵی ٢٠١٩
حکومەتی عێراق بڕیاریدا سەرجەم بارەگاکانی پارتی لە کەرکوک رادەستمان بکرێنەوە،
بەڵام بڕیارەکە جێبەجێنەکرا و نازانین بۆچی ئەو هەموو بەرهەڵستییە بەرامبەر بە گەڕانەوەی پارتی بۆ کەرکوک دەکرێت، لەکاتێکدا هەموو لایەنە کوردییەکانی دیکە لە
شارەکەدان".
شایەنی باسە، لەپاش رووداوەکانی ریفراندۆم و ئوکتۆبەری ٢٠١٧وە پارتی کەرکوک جێهێشت و لە هەڵبژاردنی پێشووی پەرلەمانی عێراق لە کەرکوک بەشداری لە پرۆسەکە نەکرد.
لە هەڵبژاردنی پێشووی پەرلەمانی عێراق کورد لەکەرکوک لە کۆی ١٢ کورسی، شەش کورسی بەدەستهێنا.