ئەندامێکی لیژنەی دارایی پەرلەمانی عێراق رایگەیاند، پرسی رادەستکردنی
تەواوی دۆسیەی نەوتی هەرێم بە بەغدامان رەتکردووەتەوە و پێیانمان وتووە لەبری ئەوە
هەر داوایەکی دیکە پێشکەش بکەن کە قابیلی جێبەجێکردن بێت.
ئەمڕۆ شەممە، ١٣ی شوباتی ٢٠٢١، شێروان میرزا، ئەندامی لیژنەی دارایی
پەرلەمانی عێراق بە BMC راگەیاند:"تا ئێستا کۆبوونەوەکانی لیژنەی دارایی بەردەوامە و وەک
ئەندامانی کورد بەو بڕگەیەی لە حکومەتەوە دیاریکراوە رازین، بە لایەنە شیعییەکانیشمان
وتووە ئەگەر بەو بڕگانە رازی نین هەر پێشنیارێکی دیکە پێشکەش بکەن بە مەرجێک دەستوری
بێت و ماف و بەرژەوەندییەکانی هەرێمی کوردستانی تێدا پارێزراوبێت پێێ رازی
دەبین".
ناوبراو راشیگەیاند:"ئێمە وەک ئەندامانی کوردی لیژنەی دارایی
چاوەڕوانی وەڵامی لایەنە شیعییەکان دەکەین و پێشینیش دەکەین لە ماوەی چەند رۆژی داهاتوو
پرۆژە یاسای بودجەی ٢٠٢١ پێشکەشی پەرلەمان بکرێت و دەنگی لەسەر بدرێت".
شایەنی باسە، لە کۆتاییەکانی ساڵای رابردوو هەردوو حکومەتی هەرێم و فیدڕاڵ لەسەر جێگریکردنی پشکی هەرێم بە ١٢.٦٧٪ لە کۆی گشتی بودجەی عێراق رێککەوتن، بەڵام
تاوەکو ئێستا بەهۆی جیاوازی بۆچوونی نێوان حکومەتی هەرێم و لیژنەی دارایی
پەرلەمانی عێراق لەبارەی چۆنییەتی رادەستکردنەوەی داهاتەکانی هەرێم بە حکومەتی فیدڕاڵ
پرسەکە یەکلایی نەبووەتەوە.