وەزیری تەندروستی هەرێم رایگەیاند، حاڵەتەکانی گومانلێکراو بەتوشبوون بە زنجیرەی نوێی ڤایرۆسی کۆرۆنا دڵنیاکرایەوە کە بوونی هەیە و رۆژانە ئەم جۆرە ڤایرۆسە نوێیە دەستنیشان دەکرێت و گواستنەوەی خێراترە.
ئەمڕۆ یەکشەممە، ٢١ی شوباتی ٢٠٢١، سامان بەرزەنجی، وەزیری تەندروستی هەرێم رایگەیاند:"ژمارە و رێژەی توشبوون بەڤایرۆسی کۆرۆنا لەبەرزبوونەوەدایە، حاڵەتەکانی گومانلێکراو بەتوشبوون بە زنجیرەی نوێی ڤایرۆسی کۆرۆنا دڵنیاکرایەوە کە بوونی هەیە و رۆژانە ئەم جۆرە ڤایرۆسە نوێیە دەستنیشاندەکرێت و بەراورد بە کۆڤید ١٩ گواستنەوە خێراترە".
ناوبراو راشیگەیاند:" بەکارهێنانی ماسک و دوورکەوتنەوە لەیەکتر تا ئێستاش گرنگترن رێکاری خۆپارێزیە".
شایەنی باسە، ئەمڕۆ بۆ یەکەمین جار پێنج حاڵەتی توشبوون بە ڤایرۆسی نوێی کۆرۆنا گۆڕاوەکە لە هەرێمی کوردستان تۆمارکرا و سەرجەمیان دانیشتووی شاری هەولێرن و تەمەنیان لە نێوان ٢٠ تا ٤٠ ساڵانن.