پۆلیسی سلێمانی دەستگیرکردنی گەنجێکی تەمەن ٢٧ ساڵان بە تۆمەتی هەڕەشەی بڵاوکردنەوەی وێنە تایبەتەکانی کچێک راگەیاند.
ئەمڕۆ یەکشەممە، ٢١ی شوباتی ٢٠٢١، بەڕێوەبەرایەتی پۆلیسی سلێمانی بڵاوێکردووەتەوە:"لەسەر سكاڵای یاسایی کچێک و بەتۆمەتی هەڕەشەی بڵاوکردنەوەی وێنە تایبەتەکانی لەئەگەری بەردەوام نەبوون لەپەیوەندی لەگەڵیدا، گەنجێکی تەمەن ٢٧ ساڵان بە ناوی (ش، ع، ق) دەستگیرکرا".
ئاماژە بەوەشکراوە:"پاش کۆکردنەوەی زانیاری لەسەر تۆمەتبارەکە پۆلیس لێکۆڵینەوەکانی دەستپێکرد و توانرا لەماوەیەکی کەمدا لەلایەن مەفرەزەکانی بنکەی پۆلیسی كوردساتەوە دەستگیر بکرێت".
ئەوەشخراوەتەڕوو:"لەئێستادا تۆمەتبارەکە بەبڕیاری دادوەری لێکۆڵینەوە راگیراوە و لێکۆڵینەوەکان لەگەڵیدا بەردەوامە".