Alternate Text

زۆرترین بینراو

Alternate Text

مەسرور بارزانی: چارەسەرکردنی کێشەکانی نێوان هەولێر و بەغدا لە بەرژەوەندی هەموو هاووڵاتییانی عێراقدایە

کوردستان

پێش 1 هەفتە

Alternate Text

مەسرور بارزانی، سەرۆکی حکومەتی هەرێم رایگەیاند، پێویستە کێشەکانی نێوان هەرێمی کوردستان و حکومەتی فیدراڵی، لە سەر بنەمای دەستوور کە زۆرینەی عێراقییەکان دەنگیان لە سەر داوە، بە شێوەیەکی بنەڕەتی چارەسەر بکرێن و رێز لە قەوارەی دەستووری هەرێمی کوردستان بگیرێت.
ئەمڕۆ یەکشەممە، ٢١ی شوباتی ٢٠٢١، مەسرور بارزانی، سەرۆکی حکومەتی هەرێم لە پەرواێزی وتارێکدا لە مەراسیمی شەهیدانی عێراق رایگەیاند:" خەڵکی کوردستان سەدان هەزار شەهیدی لە پێناو نەهێشتنی دیکتاتۆری و هاتنەئارای عێراقێکی دیموکرات و فیدراڵدا داوە و ناکرێ ئەو هەموو قوربانیدانەی خەڵکی کوردستان لە بیر بکەین".


دەقی وتارەکە

بەناوی خوای گەورە و میهرەبان
بەڕێز سەید عمار الحکیم ، ڕێبەری ڕەوتی حیکمە :
میوانان و ئامادەبووانی بەڕێز:
خۆشحاڵم کە بەناوی سەرۆکی حکومەتی هەرێمی کوردستانەوە، ڕێزدار مەسرور بارزانی لەم کۆڕی ماتەمینییەدا بەشدارم کە بۆ وەبیرهێنانەوە و ڕێزگرتنە لە شەهیدی میحراب ئایەتوڵڵای عوزما محەمەد باقر الحکیم کە یەکێک بوو لە پیاوە مەزنەکانی عێراق و نموونەی خەباتکارێکی ئازابوو لە دژی زۆرداریی و هەموو ژیانی خۆی ، لە پێناو کۆتایی هاتنی زوڵم و ستەم و دیکتاتۆریەت لە عێراق تەرخان کرد و شەهید بوو.
بۆیە ئەمڕۆ بە شکۆوە، یادی ئەم مرۆڤە مەزنە دەکەینەوە کە لەدەستدانی، زیانێکی گەورە بوو بۆ گەلانی عێراق .
ئامادەبووانی بەڕێز :
ئەمڕۆ ئەم یادە ماتەمینیەی شەهیدانی عێراق ، پێویستە هاندەرێکی زیاترمان بێت، لە پێناو ڕێزگرتن لە هەموو ئەو بەها پیرۆزانەی کە ئەم شەهیدانە، قوربانیان لە پێناویدا و شەهیدبوون ، کە ڕووخاندنی ڕژێمی دیکتاتۆری و کۆتاییهاتنی نەهامەتییەکانی گەلانی عێراق و سەقامگیرکردنی سیستەمێکی دیموکراتی و فیدرالییە لە عێراق.
بەداخەوە ئەمڕۆ عێراق، بەدەست چەندین کێشەوە دەناڵێنێت و پێویستە پێداچوونەوەیەکی جیددی بە سیستەمی سياسیی و حوکمڕانی لە عێراقدا بکرێت و ڕێز لە خواست و ماف و داوا ڕەواکانی پێکهاتە جیاوازەکانی عێراق و لە نێویشیاندا گەلی کوردستان بگیرێت، لە سەر بنەمای لە بەرچاوگرتنی پرنسیپەکانی هاوسەنگی و شەراکەت و سازان .
خەڵکی کوردستان سەدان هەزار شەهیدی لە پێناو نەهێشتنی دیکتاتۆری و هاتنەئارای عێراقێکی دیموکرات و فیدراڵدا داوە و، ناکرێ ئەو هەموو قوربانیدانەی خەڵکی کوردستان لە بیر بکەین.
بۆیە پێویستە کێشەکانی نێوان هەرێمی کوردستان و حکومەتی فیدراڵی، لە سەر بنەمای دەستوور کە زۆرینەی عێراقییەکان دەنگی لە سەر داوە ، بە شێوەیەکی بنەڕەتی چارەسەر بکرێن و ڕێز لە قەوارەی دەستووری هەرێمی کوردستان بگیرێت.
بێگومان چارەسەرکردنی کێشەکانی نێوان هەرێمی کوردستان و حکومەتی فیدراڵی، لە بەرژەوەندی هەموو هاووڵاتییانی عێراقدایە و هێز و لایەنە عێراقییەکان، پێویستە بە چاوێکی دۆستانە لە هەرێمی کوردستان بڕوانن و بەهێزبوونی پێگەی سیاسی و ئابووری هەرێمی کوردستان، بە بەهێزبوونی پێگەی عێراق بزانن ، چونکە هەرێمی کوردستان وەک چۆن لە سەردەمی ڕژێمی دیکتاتۆری پەناگەیەکی ئارام بوو بۆ هێز و لایەنە سیاسییە ئۆپۆزیسیۆنەکانی عێراق ، ئێستاش بە هەمان شێوە ، باوەشی گەرمی بۆ سەدان هەزار ئاوارەی پارێزگاکانی عێراق کردووەتەوە و بەردەوامیش دەبێت لە خزمەتکردنیان، تا ئەوکاتەی بە شێوەیەکی ئارەزوومەندانە دەگەڕێنەوە شوێنەکانیان.
ئامادەبووانی بەڕێز :
هەرێمی کوردستان هەمیشە فاکتەرێکی سەقامگیریی بووە لە عێراقدا،  بۆیە پێویستە لایەنە عێراقییەکان، هەڵوێستێکی دۆستانەیان بەرامبەر ماف و شایستە دەستوورییەکانی خەڵکی کوردستان هەبێت. چونکە بەهێزبوونی هەرێمی کوردستان بەهێزبوونی هەموو عێراقە.
ئێمە هەمیشە ئامادەیی خۆمان بۆ چارەسەرکردنی کێشەکان دەربڕیوە کە تەنیا پەیوەست نین بە مووچە و بودجە و کێشەی داراییەوە، بەڵکو پێویستە هەموو کێشە هەڵپەسێردراوەکانی تریش، وەک جێبەجێکردنی ماددەی 140 ی دەستوور و ناوچە کوردستانییەکانی دەرەوەی هەرێم و نەوت و گاز و پێشمەرگە و کێشەکانی تر، بە شێوەیەکی بنەڕەتی و لە سەر بنەمای دەستوور چارەسەر بکەین.
لە کۆتاییدا سڵاو لە گیانی پاکی شەهیدی میحراب و سەرجەم شەهیدانی عێراق و کوردستان .

Copyright 2019 BMC TV. All right reserved

Designed and Developed by AVESTA GROUP