وەزارەتی پێشمەرگە رایگەیاند، وا بڕیارە لیوا هاوبەشەکانی سەر بە وەزارەتی پێشمەرگە لەم مانگەدا سێ مووچە بەسەر یەکەوە وەربگرن.
ئەمشەوی یەکشەممە ٢١ی شوباتی ٢٠٢١، رایگەیاندنی وەزارەتی پێشمەرگە رایگەیاند:" لەم مانگەدا لیوا هاوبەشەکان سێ مووچە بەسەر یەکەوە وەردەگرن و هیچ لێبڕینێک لە مووچەکانیاندا ناکرێت".
هاتووشە" لەگەڵ ئەوانیشدا مووچەی لیوای ١٢ی پیادە بەبێ لێبڕین دابەشدەکرێت و کێشەکانیان چارەسەرکراوە".
ئەمە لە کاتێکدایە لەماوەی پێشوودا وەزارەتی پێشمەرگە رایگەیاند، ئەو بڕە هاوکارییەی کە پێشتر هاوپەیمانان بۆ پێشمەرگەیان دەنارد و دەچووە سەر هەژماری وەزارەتی دارایی، لە ئێستادا دەچێتە سەر هەژماری تایبەتی وەزارەتی پێشمەرگە و راستەوخۆ.