چەند رۆژێک بەر لە ئێستا لەگەڕەکی ئەڵماسی شاری کەرکوک، کەسێکی بە رەگەز عەرەب ژنێکی بەتەمەن رادەگرێت و خۆی بە خێرخوازێکی ئیماراتی دەناسێنێت، پاشان لەگەڵ چەند کەسێکی دیکە ژنەکە رازی دەکەن بەوەی لەو کارە خێرخوازییە بەشداربێت و بڕی ١٠ ملیۆن دیناری لێ وەردەگرن و پاشان هەڵدێن.

ئەمڕۆ سێشەممە، ٢٣ی شوباتی ٢٠٢١، دایکی محەمەد، کە ژنێکی دانیشتووی شاری کەرکوکە و پیشەی مامۆستایە، بە BMC راگەیاند:" رۆژی پێنجشەممەی رابردوو لەگەڕەکی ئەڵماس پیاوێکی رەشپێست رایگرتم و خۆی وەک خێرخوازێکی ئیماراتی پێم ناساند و داوای لێکردم کە بانکێکی نیشان بدەم بۆ ئەوەی پارەکانی کە لە دراوی "روبڵ"ی رووسییە، بیکات بە دیناری عێراقی، لەو کاتەدا کەسێکی دیکە هات و خۆی وەک دکتۆر ناساند".

ناوبراو راشیگەیاند:"هەردووکیان تاکسییەکیان راگرت و پێیان وتم دەمانەوێت هاوکاری کەسانی بێ سەرپەرشتیار بکەین و ئەگەر بەشداربیت لەو کارە خێرخوازییە دواتر پارەی زیاترت پێ دەدەینەوە".

ئاماژەی بەوەشکرد:"پاش ئەوەی تاکسییەکەیان راگرت منیش لەگەڵیان سەرکەوتم و بەرەو ماڵی خۆمان بەرێکەوتین، بڕی ١٠ ملیۆن دیناری عێراقیم پێدان و ئەوانیش بڕێک پارەیان پێدامەوە و وتیان ئێوارە ئەو بڕەی دیکە کە ماوەتەوە بە زیاتر دەتدەینەوە، بەڵام دەرکەوت ئەو پارانە ساختەن پێیانداوم و هەرسێکیان پێکەوە بوونە و فێڵیان لێکردووم".

ئەوشیخستەڕوو:" بە مەبەستی تۆمارکردنی سکاڵای یاسایی چوومە هەریەکە لە بنکەکانی پۆلیسی قۆرییە و رەحیماوە، بەڵام پێیان وتم کە دۆزینەوە ئەو کەسانە ئەستەمە، لەبەر ئەوەی هیچ شتێک لەبارەیانەوە نازانم".