ئاوات شێخ جەناب ئاشکرایکرد کە داهاتی
بەردەستی حکومەتی هەرێم زیادیکردووە و ئەگەر داهاتەکە زیاتر بێت رێژەی لێبڕین
موچەش کەمدەبێتەوە.
ئەمڕۆ چوارشەممە، ٢٤ی شوباتی ٢٠٢١، ئاوات شێخ
جەناب، وەزیری دارایی و ئابووری حکومەتی هەرێم رایگەیاند:" ئێمەش لە
ئەنجومەنی وەزیران رەخنەمان لە سیاسەتی نەوتی هەرێم هەیە و پێویستە پێداچوونەوە بە
گرێبەستە نەوتی و خەرجییەکان بکرێت".
ناوبراو راشیگەیاند:"بۆ یەکەمین جار
داهات و خەرجی و قەرزی نەوت بە شەفافی دێتە نێو پرۆژە یاسای بودجەی ٢٠٢١ی
هەرێمی کوردستانەوە، پەسەندکردنی ئەو پرۆژەیەش یارمەتیدەر دەبێت بۆ ئەنجامدانی
چاکسازی و لەنێوشیاندا جاکسازی لە گەندەڵی".
لەبارەی هەنگاوەکانی پەسەندکردنی پرۆژە یاسای
بودجەی ٢٠٢١ی عێراق وەزیری دارایی و ئابوری ئاماژەی بەوەشکرد:"هێشتا لایەنە شیعەکان
لەسەر هەڵوێستی کۆتایی بەرامبەر بە پشکی هەرێم لە بودجەی ٢٠٢١ی عێراق
رێککنەکەوتوون و یەک هەڵوێستی لایەنە کوردستانییەکانیش لە عێراق روڵێکی باشی هەبووە".