وەزیری تەندروستی هەرێم ئاشکرایکرد، بڕیارە رۆژی
پێنجشەممە بڕی ٣٣٦ هەزار ژەمە ڤاکسینی کۆرۆنا لە جۆری ئەسترازینیکا بگاتە عێراق و
پشکی هەرێمی لەو کاروانە ٤٣ هەزار ژەمە ڤاکسینە.
ئەمڕۆ چوارشەممە، ٢٤ی ئازاری ٢٠٢١، سامان بەرزنجی،
وەزیری تەندروستی هەرێم رایگەیاند:" بڕیارە سبەی ٤٣ هەزار ژەمە ڤاکسینی کۆرۆنا
بگاتە هەرێمی کوردستان کە لە جۆری "ئەسترازینیکا"ی بەریتانییە و لەلایەن
دامەزراوەی "کۆڤاکس"ی نێودەوڵەتییەوە کڕاون".
ناوبراو راشیگەیاند:" ئەو ڤاکسینەی سبەی دەگاتە
هەرێم جیاوازییەکی ئەوتۆی لەگەڵ ڤاکسینی "سینۆفارم"ی چینی نییە و و پێی
هەمان سیستەمی پێشوو دابەشدەکرێت و سەرەتا بە کارمەندانی تەندروستی دەدرێت".
ئاماژەی بەوەشکرد:" ئەو ڤاکسینە چینییەی پێشتر
گەیشتە هەرێم و بەسەربەشێک لە کارمەندانی تەندروستی دابەشکرا هیچ گرفتێکی نەبووە و
بە رێگە زانستییەکان بەکارهێندراون".
دیاریکردنی رێژەی پشکی هەرێمی کوردستان لە ڤاکسینی کۆرۆنا لەلایەن حکومەتی
عێراقەوە بە گوێرەی ژمارەی دانیشتوانە و حکومەتی عێراق لە پلانیدایە ٢٠٪ دانیشتوانی
عێراق بە ڤاکسینی کۆرۆنا بکوترێن.