بریکاری وەزارەتی تەندروستی ئاشکرایکرد، بڕیاردان لەسەر بەردەوامبوونی
داخستنی خوێندنگەکان، یاخود دەستپێکردنەوەی دەوام لە دەسەڵاتی لیژنەی پەروەردە و
خوێندنی باڵای پەرلەمان نییە.
ئەمڕۆ چوارشەممە، ٢٤ی ئازاری ٢٠٢١، د. رەهێڵ فەرێدون،
بریکاری وەزارەتی تەندروستی هەرێم بە BMC راگەیاند:" دیاریکردنی وادەی راگرتن و دەستپێکردنەوەی دەوامی خوێندنگەکان لە
دەسەڵاتی لیژنەی پەروەردە و خوێندنی باڵای پەرلەمان نییە و پێویستە لیژنەی باڵای
رووبەڕووبوونەوەی کۆرۆنا بڕیار لەوبارەیەوە بدات".
ناوبراو راشیگەیاند:" پەرلەمان لایەنی
دەرکردنی یاسایە و لایەنی جێبەجێکردن نییە، ئەوان تەنها بۆیان هەیە چاودێری
بڕیارەکانی حکومەت بکەن ".
ئاماژەی بەوەشکرد:" تاوەکو ئێستا
وەزارەتی تەندروستی هیچ پێشنیازێکی لەبارەی بەردەوامبوونی داخستنی دەرگای
خوێندنگەکان، یاخود دەستپێکردنەوەی دەوامی پێشکەش بە لیژنەی باڵای
رووبەڕووبوونەوەی کۆرۆنا نەکردووە و لە کۆتایی رۆژانی هەفتەدا هەڵسەنگاندن بۆ دۆخی
کۆرۆنا دەکرێت".
شایەنی باسە، ئەمڕۆ عەبدولسەلام دۆلەمەری،
سەرۆکی لیژنەی پەروەردە و خوێندنی باڵا لە پەرلەمانی کوردستان رایگەیاند:" راگرتنی
دەوامی خوێندکارانی قۆناغی یەکی بنەڕەتی تاوەکو قۆناغی ١١ی ئامادەیی بەردەوام دەبێت ".