بە گوێرەی زانیارییەکانی BMC بڕیارە حکومەتی هەرێم رێژەی لێبڕینی مووچەی ئەم
مانگەی فەرمانبەران بۆ ١٥٪ کەم بکاتەوە.
ئەمڕۆ دووشەممە، ٥ی نیسانی ٢٠٢١، سەرچاوەیەک لە لیژنەی دارایی پەرلەمانی
کوردستان بە BMC راگەیاند:" بەهۆی زۆربوونی داهاتی بەردەستی
حکومەت، بڕیارە رێژەی لێبڕینی مووچەی ئەم مانگەی فەرمانبەران بۆ ١٥٪ کەم بکرێتەوە
".
وتیشی :" بەدووری دەزانم لێبڕینی مووچەی فەرمانبەران بەمزووانە کۆتایی
بێت، بەڵام دەکرێت رێژەکەی کەمبکرێتەوە ".
BMC زانیویەتی کە دوای رەوانەکردنی پشکی هەرێم لەلایەن بەغدا و
زۆربوونی داهاتی ناوخۆ بەهۆی بەرزبوونەوەی نرخی نەوت، لیژنەی دارایی پەرلەمانی
کوردستان بەنیازە حکومەت بانگهێشت بکات و داوای کۆتاییهێنان بە سیستەمی لێبڕینی
مووچە بکات.
پێشتر حکومەتی هەرێم بڕیاریدابوو رۆژی ٢٥ی هەموو
مانگێک دەست بە دابەشکردنی مووچەی فەرمانبەران بکات.