لێپرسراوی
راگەیاندنی فەرمانگەی ژینگەی سلێمانی رایگەیاند، گازی ئێس ئۆ تو گازێکی نوێ
نییە و جێی مەترسی نییە بۆ سەر هاوڵاتیانی هەرێمی کوردستان.
ئەمڕۆ سێشەممە سوبحان حوسێن لێپرسراوی راگەیاندنی فەرمانگەی ژینگەی سلێمانی
لە لێدوانێکیدا بە BMCی راگەیاند:" گازی ئێس ئۆ تو یەکێکە لەو گازانەی دەبێتە هۆی پیسبوونی
ژینگە و زیانی بۆ تەندروستی هەیە، ئۆتۆمبێل و سوتاندنی خەڵوز و گڕکانەکان سەرچاوەی دەردان و دروستبوونی ئەو گازەن".
راشیگەیاند:" ئەم گازە بۆ هەرێمی کوردستان شتێکی
نوێ نییە و پێویست ناکات هاوڵاتیان بترسن، چونکە بەهۆی زۆری سەرچاوەکانییەوە
بەردەوام بوونی هەیە".
ئاماژەی بەوەشکرد:"ئەگەر گازەکە بەرێژەیەکی چڕ و لە
ئاستێکی نزمدا روو بکاتە ئاسمانی هەرێمی کوردستان جێی مەترسییە، بەڵام خۆشبەختانە
لە ئەگەری گەیشتنی گازەکە بە ناوچەکە، لە ئاستێکی بەرزدا دەبێت و چڕییەکی کەمی دەبێت،
بە شێوەیەک کە ئەگەری زۆرە هاوڵاتیان هەستیشی پێنەکەن".
لێپرسراوی راگەیاندنی فەرمانگەی ژینگەی سلێمانی
جەختیلەوەشکردەوە:" بەهۆی دووری مەودای نێوان هەرێمی کوردستان و سەرچاوەی
گازەکە کە گڕکانی ئێتنایە لە وڵاتی ئیتاڵیا، گازەکە چڕییەکی زۆری لە دەستداوە و لە
ئەگەری گەشتنی بە ئاسمانی هەرێم کاریگەرییەکی زۆر بەجێ ناهێڵێت".