پەرلەمانتارێکی کوردستان رایدەگەیەنێت، داوایان
کردووە بابەتی لێبڕینی مووچە لە دانیشتنی سبەینێی پەرلەماندا بخرێتە بەرنامەی کارەوە.
ئەمڕۆ سێشەممە ئاشنا عەبدوڵا پەرلەمانتاری
کوردستان لە لێدوانێکیدا بۆ BMC رایگەیاند :"بە پێی
مادەی ٤٨ی بڕگەی چوارەم لە پەیڕەوی ناوخۆی پەرلەمان کوردستان دەتوانرێت داوای زیادکردنی
بڕگەیەکی بەرنامەی کار بکرێت، سەرۆکی فراکسیۆن و پەرلەمانتاران یاخود سەرۆکی پێکهاتەکان
دەتوانن ئەو داواکارییە ئاڕاستە بکەن".
راشیگەیاند:"ئەمڕۆ ژمارەیەک پەرلەمانتار داوامانکردووە بابەتی بڕینی مووچەی فەرمانبەران
بخرێتە بەرنامەی کارەوە و بۆ ئەو مەبەستەش ١٧ پەرلەمانتار ئیمزامان لەسەر یاداشتێک
کردووە و پێشکەشی سەرۆکایەتی پەرلەمانمان کردووە".
جەختیلەوەشکردەوە:"پێمان وایە لە ئێستادا
ئەرکی پەرلەمانی کوردستان چاودێریکردنی ئەو رێکەوتنەیە کە حکومەتی هەرێمی کوردستان
لەگەڵ حکومەتی ناوەندی کردوویەتی".
ئاماژەی بەوەشکرد:"بە وتەی وەفدی
دانوستانکارو زۆرێک لە لایەنەکان رێکەوتنی نێوان بەغداد و هەرێم رێکەوتنێکی زۆر
باشە و دەسکەوتێکی گەورەیە، بۆیە ئێمە پێمان وایە گەر بەڕاستی دەستکەوتەکە ئەوەندە گەورە بێت
لانیکەم دەتوانرێت کۆتایی بە لێبڕینی مووچەی فەرمانبەرانی هەرێمی کوردستان بهێنرێت".
پەرلەمانتارەکە راشیگەیاند:" بە گرنگی
دەزانین ئەم بابەتە لە دانیشتنی سبەینێی پەرلەماندا بخرێتە بەرنامەی کارەوە، پێشمان
وایە دەبوو سەرۆکایەتی پەرلەمان خۆیان ئەم بابەتە بخەنە بەرنامەی کارەوە بەڵام بەداخەوە
نەیانخستووە".