قائیمقایەتی سلێمانی رایگەیاند، له‌چوار مانگی رابردودا، قائیمقامیه‌تی سلێمانی به‌هاوكاری هێزه‌ ئه‌منییه‌كان توانیویه‌تی له‌ رێگه‌ی لیژنه‌ی هاوبه‌شی ته‌ندروستییه‌وه‌ ده‌ست به‌سه‌ر بڕێكی زۆر ده‌رمانی خراپ و ماوه‌به‌سه‌رچودا بگرێت كه‌به‌شێوه‌ی قاچاغ هاورده‌ی هه‌رێم كراون.

ئەمڕۆ سێشەممە ٦ی نیسان، د، پەرست نەقشبەندی پزیشكی ده‌رمانساز و نوێنه‌ری به‌ڕێوه‌به‌رایه‌تی ته‌ندروستی سلێمانی له‌ لیژنه‌هاوبه‌شه‌كانی قائیمقامیه‌ت رایگه‌یاند:" به‌هاوكاری هێزه‌ ئه‌منییه‌كان، لیژنه‌ی هاوبه‌شی ته‌ندروستی له‌ چوار مانگی رابردودا ده‌ستیان به‌سه‌ر زیاتر له‌ (100) هه‌زار پارچه‌ی ده‌رمانی جۆراوجۆردا گرتوه‌ كه‌به‌شێوه‌ی قاچاغ هاورده‌ی هه‌رێمی كوردستان كراون".

وتیشی:" جۆری ئه‌و ده‌رمانانه‌ی ده‌ستی به‌سه‌ردا گیراوه‌ له‌ ماوه‌به‌سه‌رچوو، بێ سه‌رچاوه‌ و خراپ عه‌مباركردن پێكهاتوه‌ و له‌ چوار مانگی رابردوودا لیژنه‌ی هاوبه‌شی ته‌ندروستی قائیمقامیه‌تی سلێمانی‌ (٢٨٠) سه‌ردانی بۆ ده‌رمانخانه‌ و نۆرینگه‌ و هه‌مو ئه‌و شوێنانه‌ ئه‌نجامداوه کە‌ هاوڵاتیان بۆ وه‌رگرتنی چاره‌سه‌ر رووی تێده‌كه‌ن".

ئاماژەی بەوەشدا:" لە کۆتی ٢٨٠ سەردان، ١٢٠ سه‌رپێچی و ٤٥ داخستن و ١٥ ئاگاداركردنه‌وه‌ و هه‌روه‌ها به‌هۆی چه‌ند باره‌كردنه‌وه‌ی سه‌رپێچییه‌وه‌ دوو شوێن روبه‌ڕوی دادگا كراونه‌ته‌وه‌".

ئەوەشهاتووە:" به‌فه‌رمانی قائیمقامی سلێمانی سه‌رجه‌م ئه‌و ده‌رمانانه‌ی ده‌ستیان به‌سه‌ردا گیراوه‌، له‌لایه‌ن لیژنه‌ی تایبه‌ت به‌له‌ناوبردنی ده‌رمان له‌ناوده‌برێت".