بڕیارە کاتژمێر ١١ی بەیانی ئەمڕۆ شاندنی دانوستانکاری حکومەتی هەرێم بە سەرۆکایەتی قوباد تاڵەبانی بچێتە پەرلەمانی کوردستان و روونکردنەوە لەبارەی پرسی لێبڕینی مووچە و رێککەوتنیان لەگەڵ بەغدا بدەن.

پێشتر زیاد جەبار، سەرۆکی فراکسیۆنی یەکێتی لە پەرلەمانی کورستان بە BMC راگەیاندبوو:" شاندی حکومەتی هەرێم و دێنە پەرلەمان و لەگەڵ سەرۆکایەتی پەرلەمان و سەرۆکی فراکسیۆنەکان و ئەندامانی لیژنەی دارایی کۆدەبنەوە و تێیدا شاندەکە روونکردنەوە لەبارەی رێککەوتنیان لەگەڵ بەغدا، داهاتی هەرێم و لێبڕینی مووچە و چەند پرسێکی دیکە دەدەن ".

ئەوەشی راگەیاندبوو :" یەکێک لە هەوڵەکانی فراکسۆنەکی یەکێتی چارەسەرکردنی پرسی لێبڕینی مووچەی فەرمانبەرانە ".

لە ٣١ی ئازار بە زۆرینەی دەنگ بودجەی ساڵی ٢٠٢١ لە پەرلەمانی عێراق پەسەندکرا و پاش نزیکەی ١٩ سەردانی شاندی حکومەتی هەرێم بە سەرۆکایەتی قوباد تاڵەبانی، جێگری سەرۆکی ئەنجومەنی وەزیران بۆ بەغدا، دواجار پشکی هەرێم بە زیاتر لە ١٣٪ی کۆی بودجەی عێراق پەسەندکرا.