وتەبێژی دەستەی ژینگەی هەرێم رایگەیاند، بەهۆی تەقینی گڕکانی "سان
ڤینست" لە دوورگەی خۆرئاوای زەریای ئەتڵەسی و دەریای کاریبی، شەوی رابردوو
گازێکی ژەهراوی گەیشتە ئاسمانی هەرێمی کوردستان و بەشێک لە وڵاتانی ناوچەکە.
ئەمڕۆ یەکشەممە، ١٨ی نیسان، ئەحمەد محەمەد، وتەبێژی دەستەی ژینگەی هەرێم بە BMC راگەیاند:" بەهۆی تەقینی گڕکانی (سان ڤینست) لە دوورگەی خۆرئاوای زەریای ئەتڵەسی
و دەریای کارینی، شەوی رابردوو گازێکی زۆری کبریتی S02 ئاسمانی هەرێمی کوردستان و وڵاتانی ناوچەکەی
گرتەوە، بەڵام زۆر بە سووکی کاریگەریی
لەسەر هەرێمی کوردستان هەبوو و هاوشێوەی شەپۆلی گڕکانی (ئیتنا) بوو ".
ناوبراو راشیگەیاند:"
هاتنی ئەو گازە تا رادەیەک کاریگەری لەسەر بەرزبوونەوەی پلەکانی گەرما دەبێت و
ماوەی مانەوەشی لە ئاسمانی هەرێم پەیوەستە بە ئاستی خێرایی با، ئەگەر ئاستی با
خێرابێت گازەکە زووتر لەسەر ئاسمانی ناوچەکە نامێنێت ".
ئەوەشی خستەڕوو :"
بەهۆی ئەوەی لە هەرێمی کوردستان چەندین کارگە بوونی هەیە و پشت بە سەرچاوەی وزە
تەقلیدییەکان دەبەسترێت، لە بنەڕەتدا ئەو گاز ژەهراوییە لە ئاسمانی هەرێمدا بوونی
هەیە و کاریگەری لەسەر دانیشتوانەکەی نابێت ".
ئاماژەی بەوەشکرد:"
رەنگە گازە کاریگەری لەسەر وڵاتی سعودیە هەبێت، لەبەر ئەوەی لەم هەفتەیەدا
شەپۆلێکی بارانبارین رووی لەو وڵاتە کردووە و ئەگەرینی بارینی ترشە باران هەیە، کە
ئەویش زیانی بۆ کشتوکاڵ و ئۆتۆمبێل دەبێت ".