دادگای تەمیز بڕیاری لەسێدارەدانی بۆ بکوژی سێوان قادر و منداڵەکانی پەسەندکرد و لە ئێستادا جێبەجێکردنی بڕیارەکە لەسەر ئیمزای سەرۆکی هەرێم وەستاوە.
ئەمڕۆ دووشەممە ١٩ی نیسان، کۆساڵان حەمە موراد پارێزەری کەیسی سێوان و منداڵەکانی رایگەیاند:" ئەمڕۆ لە دادگای تاوانەکانی سلێمانییەوە ئاگادارکراینەوە کە دادگای تەمیز بڕیاری لە سێدارەدانی بۆ هاوسەرەکەی سێوان قادر پەسەندکردووە".
ئاماژەی بەوەشکردووە:" لە ئێستادا بڕیاری لە سێدارەدانەکە چاوەڕوانی ئیمزای سەرۆکی هەرێمی کوردستانە لە ئەگەری ئیمزاکردنی کەیسەکە لەلایەن نێچیرڤان بارزانییەوە بڕیارەکە جێبەجێدەکرێت".
ئەمە لە کاتێکدایە لە رۆژی ١١/٨/٢٠٢٠ لە دوای ١٦ دانیشتنی دادگا و بەهەبوونی بەڵگەی تەواو لەسەر دۆسییەکە دادگا بڕیاری لە سێدارەدانی بۆ هاوسەرەکەی سێوان قادر دەرکرد کە تۆمەتباربوو بە سوتاندنی سێوان و منداڵەکانی، پاش دەرچوونی بڕیاری لە سێدارەدانەکە کەسوکاری تاوانبارەکە داوای تەمیزکردنەوەی بڕیارەکەیان کرد لەلایەن دادگاوە و ئەمڕۆ دادگای تەمیز بڕیاری لە سێدارەدانەکەی پەسەندکرد.