نوسەری ئەمریکی ئەناییز نین دەڵێ؛ باوەڕ بەخۆبون جەنگێکە هەموو خاڵە لاوازەکانی سەرنەکەوتن لەگۆڕ دەنێت.
لەدونیای سیاسەتدا دەگمەنن ئەو پیاوانەی ( مرۆڤانەی ) کە بەهێزی و باوەڕبەخۆبوون بەرەو لوتکەی سەرکەوتنی بردوون، دانسقەن ئەوانەی پشودرێژی و هیوا گەیاندونیەتە هەرەمی دەسەڵات.
لە کایەی سیاسی و حکومڕانی ئێستای هەرێمی کوردستان، لەپاڵ ئەوانیتردا، گەنجێک بەناوی قوباد لەوپەڕی باوەڕبەخۆبوون و پشودرێژییدا لەناو کایە سیاسی و حکومڕانیەکەدا گەمە دەکات.
گەر قسە لەسەر باری نێوخۆیی یەکێتییش بکەین، بەدرێژایی دەرکەوتنی لە دوای وەفاتی مام جەلالەوە هیچ کەسمان نەدیووە لەناو یەکێتییدا بە چەشنی ئەو کارەکتەرە بە تەنها خۆی و بێ هیچ پاڵپشتییەک هەڵگری خەسڵەتی باوەڕبەخۆبوون بێت.
لەرابردوودا یەکێک بووم لەوانەی کە زۆرترین رەخنەم لە ئەدائی وەزیفی قوباد گرتووە و رەحمیشم پێ نەکردوە وە دلنیاشم زۆرێکی تر یەکییەتیەکان رەخنەی زۆریان لێ گرتوە بەڵام هەر لە سەرەتای دەرکەوتن و گەڕانەوەی بۆ کوردستان و بوون بە جێگری سەرۆک وەزیران تا ئەمساتەش، هەستم نەکردووە توڕەببێت و ماندووبێت و بێ ئارام و هیوابڕاو بێت.
ئەو ساڵانێکی زۆرە بەرگەی تیری ئەو هەموو نەیارەی گرتووە، زەمەنێکی زۆرە لەژێر بێ رەحمی نەشتەری زۆرینەماندا دێت و دەچێ، موجامەلە نیە گەر بە ئینسافەوە بڵێین؛ گەر ئێمە بوینایە رەنگە کەسمان بەرگەی ئەو هەموو توانج و دژایەتی و تیر و نەشتەرەمان نەگرتایە.!
لەناو واقعی سیاسیی یەکێتییدا، ئەو یەکێکە لەو مرۆڤە باوەڕبەخۆبوانەی کە خاوەنی ئیرادەیەکی بەهێز و ورە بەرزییە، بەدرێژایی مێژووی جێگری سەرۆک وەزیرانی هەرێم بەئاشکرا ئەوە دەبینین کە هەنگاو بە هەنگاو بەرە لوتکە دەروات و هەموو بەربەستەکان تێکدەشکێنێت، ئاخر مرۆڤی بەهێز و خاوەن هیوا ئاوڕ ناداتەوە، چاوی لە ئامانجەکەیەتی. ئامانجی جەوهەری قوباد و یەکێتییەکانیش، یەکێتییە. یەکێتییەکەی مام و یەکێتییە بەهێزەکەی جاران.
لەدوای نەخۆشکەوتن و دواتر وەفاتی مام جەلالەوە، وەک هەمیشە یەکێتی توشی گرفتی خاوەنداریەتی و جڵەوگیری بوویەوە، لە دابەشکردنی سفرە و خوانەکەی "مام و یەکێتی" هەمووان داوای پشکی شێر دەکەن، بەڵام لە لەئەستۆگرتنی بەرپرسیاریەتی هەمووان خۆیان دەدزنەوە، چونکە نایانەوێت بکەونە بەر تیر و نەشتەری یار و نەیار.
راستیەکی تاڵ و حاشاهەڵنەگریشە، نەک بە تەنها قوباد بەڵکو یەکێتییەکان بەگشتی هێندەی قوربانی دەستی برا و هەڤاڵەکانی خۆیانن نیو هێندە قوربانی دەستی نەیار و دوژمن نین، بۆیە هەمیشە زۆرینەی کادر و بەرپرسانی یەکێتی خۆیان هەڵاوێردووە لە وەرگرتنی بەرپرسیاریەتی بەتایبەت لە حکومەتدا و تایبەتریش هەلبژاردنی ئەم جارەی لیستی هاوپەیمانی کە یەکێتی و گۆران لەبەردەم کێشەگەلێکی زۆر و ئەزمەی سیاسیدا بوون ( ئەڵبەتە هەموو حیزب و لایەنە سیاسیەکانی عێڕاقیش )
بۆیە زۆرینەیان، یان بڕوایان بەخۆیان نەبووە کە دەتوانن ئەم ئەرک و بەرپرسیاریەتیە لە ئەستۆ بگرن، یان بونەتە قوربانی دەستی تەکەتول و باڵەکانی نێوخۆی حزبەکە، بەڵام، ئەم لۆژیکە بۆ قوباد تاڵەبانی رێک پێچەوانەکەی راستە، لە دوای ( ٨ تەمموز )ەوە، کەس زاتی ئەوەی نەدەکرد بەرپرسیاریەتی سەرۆکی لیستی هاوپەیمانی کوردستانی نێوان گۆڕان و یەکێتی وەربگرێ، بەڵام قوباد بێ هیچ سڵەمینەوەیەک و بەوپەری باوەڕبوخۆبونەوە ئەوەی قبوڵکرد و تا کۆتایی بەردەوام بوو و سەرکەوتوش بوو.
ئاخر قورسە، لەم دۆخە دژوارەی خەڵک، لەو هەموو بێ هیوایی و برسێتی و بێ مووچەییەدا، لەو هەموو ئاستەنگ و گرفتە نێوخۆییەی یەکێتییدا، بێیت و بڵێی من خاوەندارێتی دەکەم و بەرپرسیاریەتیەکەی لە ئەستۆ دەگرم.
من پێموایە ئەم جۆرە لە سەرکێشییە، تەنها و تەنها لە سیفەت و خەسڵەتە بەهێزەکانی مام جەلال بوون، گەر قوباد لەسەر ئەم باوەڕبەخۆبوون و بیروباوەڕ و هێزە مرۆییە زاتییەی خۆی بەردەوام بێت، گومانم نیە لە داهاتوودا دەبێتە مام جەلالێکی تر لە بەرگێکی نوێ و سەردەمیانەدا وە ئەو شێوازە نەرم و نیانییەی لەسیاسەتدا دەبێتە مۆدێلێکی سیاسی سەردەمیانە، کە ئەم جیل و نەوە تازەیە ئەو شێواز و فۆرمی سیاسەتکردنەی قبوڵە.
ئەنجامی ئەم هەلبژاردنە بۆ سەرجەم هێزە سیاسییەکان شکست بوو بەلام شکست تا شکست جیاوازی هەیە، هاوپەیمانەکەمان کە لە یەکەم هەلبژاردنی خاوەنی ٢٥ کورسی بو، ئێستا خاوەنی سفر کورسییە، بە بەراورد بەو یەک دو کورسی کەم کردنە کە سەرجەم هێزە سیاسیەکانی عێراق لەئەزمەی سیاسی و ئینتیخابی دان، یەکێتی کەمترین زەرەری بەرکەوتوە و هەر لە ریزی پێشەوە ماوەتەوە و دەکرێت باشتریش بکرێت بۆ هەلبژاردنەکانی داهاتوو، ئەگەر لێ گەڕێن ئەو گەنجە بگاتە کەنار.
راستییەکی حاشا هەلنەگر هەیە کە مەزاری مام یەکە و دەباشان یەکێکە و مەرجەعیش ئەبێت هەر یەک بێت.