ئەمڕۆ، ئەمینداری ئەنجومەنی باڵای ئاسایشی نیشتیمانی ئێران لە کۆبوونەوەیدا لەگەڵ مستەفا کازمی داوای کرد کە حیزبەکانی رۆژهەڵاتی کوردستان لە خاکی عێراق و هەرێمی کوردستان دەربکرێن.
ئەمڕۆ یەکشەممە ١٢ی ئەیلول، عەلی شەمخانی، ئەمینداری ئەنجومەنی باڵای ئاسایشی نیشتیمانی ئێران لەگەڵ مستەفا کازمی سەرۆک وەزیرانی عێراق کۆبووەوە، لە تێیدا ئەو بەرپرسەی ئێران داوای بەپەلە دەرکردن و چەککردنی حیزبەکانی رۆژهەڵاتی کوردستانی کردووە.
سەرجەمیان چەکبکرێن و بۆ دەرەوەی خاکی عێراق دەربکرێن
لەو بارەیەوە ئاژانسی ئیرنای ئێرانی رایگەیاند:" لە کۆبوونەوەکەدا شەمخانی ئاماژەی بەوەداوە کە چالاکییەکانی حیزبەکانی رۆژهەڵاتی کوردستان لە هەرێمی کوردستان لە زیادبووندان، کە بووەتە هۆی نیگەرانییان، هەر بۆیە داوای کردووە سەرجەمیان چەکبکرێن و بۆ دەرەوەی خاکی عێراق دەربکرێن".
هەروەها وتیشی:" زیاد بوونی جموجۆڵی ئەو گرووپانە کاریگەری لەسەر ئاسایشی سنوورەکانی نێوان هەردوو عێراق و ئێران هەیە، بۆیە پێویستە بەپەلە دەربکرێن".