پاش ١٦ ساڵ نرخی دۆلاری ئەمریکی بەرامبەر
بە دیناری عێراقی بەرزترین ئاستی تۆمارکرد و نرخی ١٠٠ دۆلار گەیشتە ١٥٠ هەزار و ٦٠٠ دینار.
ئەمڕۆ چوارشەممە، ٩ی حوزەیران، جەبار
گۆران، وتەبێژی بازاڕی دۆلارەکەی شاری سلێمانی بە BMC راگەیاند:" سەرباری ئەوەی
بانکی ناوەندی دۆلاری زیاتری خستووەتە بازاڕەوە، بەڵام بەهۆی زۆربوونی خواست لەسەر
دۆلار لەلایەن بازرگان و هاوڵاتییانەوە، نرخی دۆلار بەرامبەر بە دینار بەرزترین
ئاستی تۆمارکرد و ١٠٠ دۆلار بە ١٥٠ هەزار و ٦٠٠ دینار مامەڵەی پێوەکرا ".
وتیشی:" هۆکارێکی دیکەی بەرزبوونی زیاتر نرخی دۆلار ئەوەیە، لە
ئێستادا بەهۆی وشکەساڵییەوە میوە و خواردەمەنی زیاتر لە وڵاتانی دیکەوە هاوردەی
عێراق و هەرێمی کوردستان دەکرێت ".