تاڵیبان: قەدەغەیە ژنان و کچان وەرزشبکەن

جیهان پێش 1 هەفتە

Alternate Text

جارێکی دیکە بزووتنەوەی تاڵیبان قەدەغەکردنی وەرزشکردنی لەژنان و کچانی ئەفغانستان دووپاتکردەوە و وەک کارێکی "ناپێویست" ئاماژەی پێکرا لەلایەن بەرپرسانی باڵای بزووتنەوەکەوە.

ئەمڕۆ چوارشەممە، ٨ی ئەیلول، ئەحمەدوڵڵا واسق، ئەندامی لیژنەی رۆشنبیری تاڵیبان لەمیانی چاوپێکەوتنێکدا لەگەڵ کەناڵی (SBS)ی ئوستراڵی رایگەیاند:" یاسا نوێیەکانی ئەمارەتی ئیسلامی ئەفغانستان رێگریدەکەن لەوەرزشکردنی ژنان و کچانی وڵاتەکە و بەتایبەتی ئەو وەرزشانەی دەبنەهۆی دەرکەوتنی جەستەیان و وەرزشکردن بۆ ژنان و کچان کارێکی پێویست نییە و جێی بایەخ نییە".

لەوەڵامی ئەو پرسیارەشدا ئاخۆ رێگە بەژنان و کچان دەدرێت یاری کریکت بکەن، ئەحمەدوڵڵا واسق وتی:" راستە کریکت وەک یاریەکی میللییە لەئەفغانستان، بەڵام ئەمە مانای ئەوە نییە لەپێناو یارییەکدا یاساکانی ئاینی ئیسلام بشکێنن چونکە لەو یاریەدا ژنان و کچان رووخسار و بەشێک لەجەستەیان داپۆشراو نابێت ئەمەش لەئاینی ئیسلامدا رێگەپێنەدراوە".

وەرزش لەکارە پێویستەکان نییە بۆ ژنان و کچان لەئیسلامدا

جەختیشیکردەوە:" ئاینی ئیسلام رێگە بەژنان و کچان دەدات بچنە دەرەوەی ماڵەکانیان تەنها بۆ کارە پێویستەکانی وەک: بازرگانیکردن و خوێندن، بەڵام وەرزش لەو پێویستییانە نییە".

ئەم لێدوانانە لەکاتێکدایە پێشتر بەرپرسانی باڵای بزووتنەوەی تاڵیبان بەڵێنی ئەوەیان دابوو مافەکانی ژنان و کچان بپارێزن لەچوارچێوەی یاساکانی ئاینی ئیسلامدا.

ئه‌مانه‌ش ببینه

‌‌مەڵتیمیدیا