سەرۆكایەتی دادگای تێهەڵچونەوەی ناوچەی سلێمانی روونکردنەوەیەکی دەربارەی دۆسیەی میران محەمەد بڵاوکردەوە و رایگەیاند، تۆمەتەكان رەتنەكراونەتە و دۆسییەكە بە ھیچ شێوەیەك دانەخراوە.
ئەمڕۆ سێشەممە، ١٤ی ئەیلول، سەرۆكایەتی دادگای تێهەڵچونەوەی ناوچەی سلێمانی روونکردنەوەیەکی دەربارەی دۆسیەی میران محەمەد بڵاوکردەوە کەئەمە دەقەکەیەتی:
دەربارەی كەیسی میران محەمەد لە دادگای سلێمانی
روونكردنەوەیەك بۆ رای گشتی ..
لە چەند كەناڵێكی راگەیاندن هەواڵێك بڵاوكراوەتەوە گوایە دادگای تەمیز فەرمانی دەستگیردنی میران محەمەدی هەڵوەشاندوەتەوە و تۆمەتەكانی رەتكردووەتەوە، بەپێویستمان زانی ئەم چەند خاڵەی خوارەوە بۆ بەرچاوڕوونی هەموو لایەك بخەینەڕوو:
١) تۆمەتەكان رەتنەكراونەتە و دۆسییەكە بە ھیچ شێوەیەك دانەخراوە و گەڕێندراوەتەوە بۆ دادگای دەستپاكی بۆتەواو كردنی رێكارە یاساییەكان.
٢) دادگا لەبڕیارەكانیدا سەربەخۆیی تەواوی هەیە و بەپێی یاسا و بەگوێرەی ئەو سكاڵا و بەڵگانەی دەخرێتە بەردەستی كار دەكات و لەسەر داوای هیچ كەسێك و لەخۆڕا دۆسیە ناكاتەوە و دۆسیە داناخات.
٣) یاسا لەسەرووی هەموو لایەكە و دادگا ئیجرائاتی یاسایی خۆی دەكات بەبێ گوێدانە پلە و پایەی لایەنەكانی داواکار و داواکراو.
سەرۆكایەتی دادگای تێهەڵچونەوەی ناوچەی سلێمانی
٢٠٢١/٩/١٤