ئەمڕۆ ئەنجومەنی وەزیرانی هەرێمی
کوردستان کۆبووەوە و لەکۆبوونەوەکەدا ( پلانی نیشتمانیی هەرێمی بۆ مافەکانی مرۆڤ
٢٠٢١-٢٠٢٥) پەسەندکرد.
ئەمڕۆ چوارشەممە، ١٥ی ئەیلول، بە سەرۆکایەتی
مەسرور بارزانی، سەرۆکی ئەنجومەنی وەزیران و بە ئامادەبوونی قوباد تاڵەبانی، جێگری
سەرۆک وەزیران ، ئەنجومەنی وەزیرانی هەرێمی کوردستان، کۆبوونەوەی هەفتانەی ئەنجامدا
و لەکۆبوونەوەکەدا لەکۆبوونەوەکەدا ( پلانی نیشتمانیی هەرێمی بۆ مافەکانی مرۆڤ
٢٠٢١-٢٠٢٥) پەسەندکرد و راگەیەندراوێکی بڵاوکردەوە کەئەمە دەقەکەیەتی:
ئەنجومەنی وەزیران (پلانی نیشتمانیی هەرێمی
بۆ مافەکانی مرۆڤ ٢٠٢١-٢٠٢٥) پەسەند کرد.
لە دەستپێکی کۆبوونەوەکەدا ، سەرۆک وەزیران
تیشکی خستە سەر ئامادەکارییەکانی هەڵبژاردنەکانی ئەنجومەنی نوێنەرانی عێراق و جەختی
لەوە کردەوە، کە پێویستە هەڵمەتی بانگەشەی هەڵبژاردن، بە شێوەیەکی ئارام و مەدەنیانە
و دوور لە ناوزڕاندن و یەکترشکاندن بەڕێوەبچێت. ئاماژەی بەوەش کرد کە ئەم هەڵبژاردنە،
بۆ ئەوەیە نوێنەرانی هەرێمی کوردستان لە بەغدا، داکۆکی لە بەرژەوەندییە گشتیەکان و
ماف و شایستەکانی خەڵکی کوردستان بکەن و پێویستە ململانێ و کێبڕکێیی نێوان حزب و
لایەنە کوردستانییەکانیش، بە ئاراستەی بەرگریکردن بێت لە پرسە نیشتمانییەکان و مافەکانی
گەلی کوردستان.
ئەنجومەنی وەزیران جەختی لە گرنگیی رۆڵی
بێ لایەنانەی دامودەزگا ئیداری و ئەمنییەکانی حکومەتی هەرێم و میدیا و رێکخراوەکانی
کۆمەڵگەی مەدەنی کردەوە لە سەرخستنی پرۆسەی هەڵبژاردن بە گوێرەی یاسا بەرکارەکان،
بە شێوەیەک پێویستە ئامانجی سەرەکی هەموو حزب و لایەنە کوردستانییەکان ئەوە بێت، لە
بەغدا بەیەکەوە داکۆکی لە مافە دەستوورییەکانی هەرێمی کوردستان و بەرژەوەندییە باڵاکانی
خەڵک بکەن.
پاشان لە لایەن رێبەر ئەحمەد، وەزیری
ناوخۆ و وەزیرە پەیوەندیدارەکان ، هەنگاوەکانی جێبەجێکردنی چەند بڕیارێکی ئەنجومەنی
وەزیران خرایەڕوو کە تایبەت بوون بە قەدەغەکردنی سیمکارتی بێ بەرایی و ئەنجامی لێکۆڵینەوە
لە کوالیتی ئاردی هاوردەکردەکراو لە دەرەوەی هەرێمی کوردستان لەڕووی خۆراکی و تەندروستییەوە.
بڕگەیەکی دیکەی کۆبوونەوەکە، تایبەت
بوو بە بڕیاردان لە سەر ڕەشنووسی ( پلانی نیشتمانیی هەرێمی بۆ مافەکانی مرۆڤ٢٠٢١-٢٠٢٥
) کە لە کۆبوونەوەی پێشووی ئەنجومەن خرایەڕوو ، لە کۆبوونەوەکەدا بە کۆی دەنگی ئەنجومەنی
وەزیران پەسەند کرا و وەزارەت و لایەنە پەیوەندیدارەکان راسپێردران، بۆ جێبەجێکردنی
پلانەکە و ئاگادارکردنەوەی ئەنجومەنی وەزیران لە بەرەوپێشچوونی جێبەجێکردنی پلانەکە
بە ئاراستەی برەودان بە مافەکانی مرۆڤ لە هەرێم.
لە کۆتایی کۆبوونەوەکەدا ، دانا عەبدولکەریم
وەزیری ئاوەدانکردنەوە و نیشتەجێکردن ، رەشنووسی ( پەیڕەوی سندووقی پاڵپشتیی گەشەپێدان
ڕێگاوبان لە هەرێمی کوردستان )ی خستەڕوو . ئەم رەشنووسە لە لایەن وەزارەتی ئاوەدانکردنەوە
و نیشتەجێکردن بە هەماهەنگیی وەزارەتە پەیوەندیدارەکان ئامادەکراوە . ئەنجومەنی وەزیران،
سەرەڕای جەختکردنەوە لە گرنگیی برەودان بە بواری رێگاوبان، بڕیاریدا وەزارەتە پەیوەندیدارەکان
لە ماوەی مانگێکدا ، پێداچوونەوەی زیاتر بە رەشنووسەکەدا بکەن لەڕووی قانونی و تەکنیکی
وداراییەوە، لەبەر رۆشنایی ئەو تێبینی وسەرنجانەی خرانەڕوو، تا ئەو پەیڕەوە ئامانجەکانی
خۆی بەدیبهێنێ لە پاڵپشتی وەزارەت لە گەشەپێدانی پڕۆژەکانی رێگاوبان و دانانی پێوەر
بۆ بەرجەستەکردنی دادپەروەریی لە دابەشکردنی پڕۆژەکانی ئاوەدانکردنەوە و رێگاوبان،
لەسەر پارێزگا و ئیدارە سەربەخۆکان بە پێی شایستەبوون، ئەویش لەبەر رۆشنایی بەرنامەی
کاری کابینەی نۆیەمی حکومەتی هەرێمی کوردستان کە گرنگیدان بە بواری ڕێگاوبان، لە بڕگە
سەرەکیيەکانیەتی.