سەباح هەورامی لەلێدوانێکدا وتی، تاکە چارەسەر ئەوەیە، حکومەت فەرمانبەرانی دامودەزگاکانی ناچار بکات ڤاکسین وەربگرن و داخستنی قوتابخانەکانیش ئەگەرێکی لاوازە.
ئەمڕۆ پێنجشەممە، ٢١ی تشرینی یەکەم، سەباح هەورامی، بەڕێوەبەری گشتی تەندروستی سلێمانی لەلێدوانێکدا بە BMC وت:" ئەگەر هاوڵاتییان هەستیان بەوەکرد کە نەخۆشن و کۆرۆنایان هەیە، دەبێت سەردانی نۆرینگە لاوەکییەکان نەکەن و چارەسەر لەکەسانی ناپسپۆڕ وەرنەگرن چونکە ئەو کەسانەی بارودۆخیان خراپە سێ هۆکاریان هەیە، وەرنەگرتنی ڤاکسین، وەرگرتنی چارەسەری هەڵە، درەنگ وەرگرتنی چارەسەری پێویست".
هەموو پەتایەک وەک کۆرۆنا مامەڵەی لەگەڵ دەکرێت
ئاماژەی بەوەشدا:" لە کۆرۆنای نوێدا، نیشانەکانی پژمین و کۆکەش هەن، بۆیە هەموو پەتایەک وەک کۆرۆنا مامەڵەی لەگەڵ دەکرێت ئەگەر هاوڵاتییان توشی پەتا بوون و ڤاکسینیان وەرنەگرتبوو و هەندێک نیشانەی وەک ئازاری ئێسکیان هەبوو پێویستە بەزووترین کات سەردانی پزیشک بکەن".
داخستنی قوتابخانەکان ئەگەرێکی لاوازە
سەباح هەورامی باسی لەوەشکرد:" لەئێستادا وەرگرتنی ڤاکسین سەرەی ناوێت و بەکەمتر لەکاتژمێرێک ڤاکسین وەردەگیرێت و بەبۆچوونی من تاکە چارەسەر ئەوەیە، حکومەت فەرمانبەرانی دامودەزگاکانی ناچار بکات ڤاکسین وەربگرن و داخستنی قوتابخانەکانیش ئەگەرێکی لاوازە".