وەزارەتی کشتوکاڵی هەرێم رایگەیاند، لیژنەیەکی
هاوبەش بۆ دەستنیشانکردنی نرخ و رێکخستنی هاوردەکردن و هەناردەکردنی هێلکە پێکدەهێندرێت.
وەزارەتی کشتوکاڵ و سەرچاوەکانی ئاوی هەرێم
بڵاویکردەوە:" لە پێناو بەرژەوەندی هاوڵاتییان و خاوەن پڕۆژە پەلەوەرییەکان بڕیاردراوە
لیژنەیەکی هاوبەش بۆ دەستنیشانکردنی نرخ و رێکخستنی هاوردەکردن و هەناردەکردنی
هێلکەی خواردن پێکبهێندرێت ".
دەقی راگەیەندراوی وەزارەتی کشتوکاڵ و سەرچاوەکانی
ئاوی هەرێم:
وەزیری کشتوکاڵی هەرێم بڕیاریداوە لیژنەیەکی
هاوبەش بۆ دەستنیشانکردنی نرخی و رێکخستنی هاوردەکردن و هەناردەکردنی نرخی هێلکەی
خواردن پێکبهێنرێت کە ئامانج لێی گۆڕانکارییە لە میکانیزمی دیاریکردنی
نرخەکەی بەجۆرێك بێت لە بەرژەوەندی هاوڵاتیان و خاوەن پڕۆژە پەلەوەریەکاندا
بگونجێت.
بێگەرد تاڵەبانی، وەزیری کشتوکاڵ و سەرچاوەکانی
ئاوی هەرێم لەگەڵ ئومێد خۆشناو، پارێزگاری هەولێر و خاوەن پڕۆژە پەلەوەریەکانی
سنوری پارێزگای هەولێر لەسەر نرخی هێلکەی خواردن کۆبوونەوە.
وەزیری کشتوکاڵ رایگەیاند، مەبەست لەو کۆبوونەوەیە
پەرەپێدانی سێکتەری کشتوکاڵ و سامانی ئاژەڵ و کەمکردنەوەی رۆتین بووە بۆ زیاتر
ساغکردنەوەی بەروبوومی جوتیارانی هەرێم لە ناوچەکانی باشور و ناوەڕاستی عێراق.
باسی لەوەشکردووە، لەرێگەی لیژنەیەکی هاوبەشەوە،
میکانیزمی دەستنیشانکردنی نرخی هێلکە گۆڕانکاری بەسەردادێت و پێویستە بەجۆرێك بێت
کە لەگەڵ واقیعی هاوڵاتیان و خاوەن پڕۆژە پەلەوەرییەکان بگونجێت.
چەند رۆژێك لەمەوبەر، بەگوێرەی راگەیەنراوێکی
وەزارەتی کشتوکاڵی هەرێم، بێگەرد تاڵەبانی وەزیری کشتوکاڵ لەگەڵ خاوەن پڕۆژە
پەلەوەرییەکانی بەرهەمهێنانی هێلکە کۆبووەتەوە و ئامانج لەو کۆبوونەوەیە
بەدواداچوونە لە گرانبوونی نرخی هێلکە.
ماوەیەکە نرخی هێلکە بەشێوەیەکی بەرچاو لە
بازاڕەکانی هەرێمی کوردستاندا بەرزبووەتەوە، وەزارەتی کشتوکاڵیش دەڵێت، بڕیاری
لێخۆشبوونی گومرگیان بۆ هاوردەکردنی سۆیا و پرۆتین و کەمکردنەوەی کرێی کارەبا بۆ
خاوەن پڕۆژەکان دەرکردووە تا نرخەکە ئاسایی ببێتەوە.