پەیجی "Traffic Fm sulaimaniyah"‌ بڵاویکردەوە، لە پێنج حاڵه‌ته‌دا ئێرباگی ئۆتۆمبێل لەکاتی ‌رووداوی هاتوچۆدا ناكرێته‌وه، بۆیە باشتروایە هەمیشە شۆفێر و سەرنشینان پشتوێنی سەلامەتی ببەستن.

ئەمڕۆ هەینی، ٣ی کانونی یەکەم، پەیجی " Traffic Fm sulaimaniyah"‌ لە بڵاوکراوەیەکیدا لە تۆڕی کۆمەڵایەتی فەیسبووک ئاماژەی بەوەکردووە:" لە پێناو سەلامەتییان ئامۆژكاری شۆفێران ده‌كرێت كه‌ هه‌میشه‌ ٢٥ سانتیمه‌تر له‌نێوان جه‌سته‌یان ‌و سوكان‌ و ئه‌و به‌شانه‌ی ئۆتۆمبێل بهێڵنه‌وه‌ كه‌ ئێرباگیان تێدایه‌ ".

بە گوێرەی بڵاوکراوەکەی ئەو پەیجە ئێرباگی ئۆتۆمبێل لەم حاڵەتانەدا ناکرێتەوە:

١ -كاتێك ئۆتۆمبێل له‌دواوه‌ تووشی رووداوی هاتوچۆ ببێت:
 به‌شێوه‌كی گشتی زۆربه‌ی ره‌های ئۆتۆمبێله‌كان، هه‌سته‌وه‌ری تایبه‌ت به‌سیستمی ئێرباگ له‌پاشه‌وه‌یاندا نییه‌، بۆیه‌ كاتێك ئۆتۆمبێل له‌دواوه‌ دووچاری لێدان ‌و رووداوی هاتوچۆ ده‌بێت، ئێرباگ ناته‌قێت‌ و كارا نابێت، هەروەها كاتێك ئۆتۆمبێل به‌ر ستون‌و دار ده‌كه‌وێت ئێرباگەکەی کار ناکات، له‌به‌رئه‌وه‌ی چه‌قی به‌ركه‌وتنه‌كه‌ له‌یه‌ك خاڵدا كۆده‌بێته‌وه‌، كه‌ پێده‌چێت هه‌سته‌وه‌ری سیستمی ئێرباگی تێدا نه‌بێت.

٢-پێكدادان له‌كاتی خلیسكان‌ و لادان له‌ڕێڕه‌و ‌و كۆنترۆڵ له‌ده‌ستداندا:
 له‌و حاڵه‌تانه‌دا زۆربه‌ی كات هه‌سته‌وه‌ره‌كان كارناكه‌ن ‌و ته‌نی به‌ركه‌وتوو دیاری ناكه‌ن، به‌و هۆیه‌وه‌ ئێرباگه‌كه‌ له‌كاتی رووداوی هاتوچۆدا ناكرێنه‌وه‌.

٣- له‌كاتی وه‌رگه‌ڕانی ئۆتۆمبێلدا ئێرباگه‌كان ئه‌وانه‌ی پێشه‌وه‌‌و لاته‌نیشته‌كان كارناكه‌ن‌و شۆفێر‌و سه‌رنشینه‌كان له‌ئه‌گه‌ر وه‌رگه‌ڕانی ئۆتۆمبێلدا ناپارێزن.

٤- له‌كاتی ئیستۆپگرتنی توندا:
له‌و حاڵه‌تدا پێشه‌وه‌ی ئۆتۆمبێل به‌هۆی ئیستۆپگرتنه‌كه‌وه‌ نزم ده‌بێته‌وه‌ ‌و هه‌سته‌وه‌ره‌كان له‌و حاڵه‌ته‌دا ناتوانن ته‌نه‌كان ‌و مه‌ترسییه‌كان دیاری بكه‌ن، به‌وهۆیه‌وه‌ له‌ئه‌گه‌ری رووداوی هاتوچۆدا ئێرپاگ ناكرێته‌وه‌.

٥- بوونی شه‌پۆلی ئامێره‌ ئه‌لكترۆنیه‌كان كه‌ به‌شێوه‌ی واریه‌لێس كارده‌كه‌ن، ته‌شویش له‌سه‌ر هه‌سته‌وه‌ره‌كان دروستده‌كه‌ن ‌و له‌ئه‌گه‌ری رووداوه‌كانی هاتوچۆدا، ئه‌و هه‌سته‌وه‌رانه‌ به‌و هۆیه‌وه‌ ناتوانن فه‌رمان به‌ئێرباگه‌كان بكه‌ن بكرێنه‌وه‌.