سەڵاحەدین بەهائەدین ئەمینداری گشتی یەکگرتووی ئیسلامی کوردستان رایگەیاند،
کورد و تورکمان خاوەنی مێژوویەکی هاوبەشن و پێکەوە قۆناغە سەختەکانی سیستەمی سیاسی
و کۆمەڵایەتییان بڕیووە.
نووسینگەی راگەیاندنی ئەمینداری گشتی یەکگرتووی ئیسلامی کوردستان لە
راگەیەندراوێکدا ئاماژەی بەوەکرد:" لە چوارچێوەی سەردانەکانی سەڵاحەدین
بەهائەدین ئەمینداری گشتی یەکگرتوو بۆ لای فراکسیۆنەکانی ئەنجومەنی نوێنەرانی
عێراق، ئەمڕۆ ئەمینداری گشتی سەردانی فراکسیۆنی تورکمانی کرد و لەگەڵ ئەرشەد سەڵاح
سەرۆکی فراکسیۆنەکە کۆبووەوە".
کورد و تورکمان پێکەوە قۆناغە سەختەکانی سیستەمی سیاسی و کۆمەڵایەتییان بڕیووە
لە کۆبوونەوەکەدا لە زاری سەڵاحەدین بەهائەدین-ەوە ئەوەشیخستەڕوو:"
کورد و تورکمان دوو نەتەوەی خاوەن مێژوویەکی هاوبەشن، پێکەوە قۆناغە سەختەکانی
سیستەمی سیاسی و کۆمەڵایەتییان بڕیووە و مێژووی ئاشتیانەی پێکەوە ژیانیان
تۆمارکردووە".
یەکگرتوو پێکهاتەکان وەک بەشێک لە جوانییەکانی وڵات دەبینێت
راشیگەیاند:" یەکگرتوو پێکهاتەکان
وەک بەشێک لە جوانییەکانی وڵات دەبینێت، دوور لە هەر گرێیەکی حیزبی و تێڕوانینی
توندی نەتەوەیی و سیاسی، لە کەرکووک و شارەکانی دیکەش، تورکمان هەن و بەشێکن لە نەسیجی
کۆمەڵایەتی کۆمەڵگای کوردستانی و عێراقی".
لەبەرامبەر ئەوەشدا ئەرشەد ساڵحی سەرۆکی فراکسیۆنی تورکمانی سوپاسی روئیای
سیاسی و کۆمەڵایەتی کرد و هەردوولایەنیش لەسەر ئەوە کۆکبوون، کە تەوافوقی نێوان
لایەنەکان کۆتایی بە بنبەستی سیاسی عێراق دەهێنێت.