دوای بڵاوبوونەوەی گرتەڤیدیۆ و وێنەی ساتی گرتنی ماسییەک لە کەناراوەکانی چیلی، ترس لای هاوڵاتییانی ئەو وڵاتە دروست بووە.
ماڵپەری ئەمەریکان پۆست بڵاویکردەوە:" چەند رۆژێک لەمەوبەر ماسییەکی گەورە لە کەناراوەکانی ئاریکا لە چیلی دەرکەوت کە درێژییەکەی پێنج مەترە و پانییەکەشی ٨٠ سانتیمەترە".
ئاماژەی بەوەشکرد:" ماسییەکە لەلایەن چەند کەسێکەوە گیراوە و وینە و گرتەڤیدیۆی لە تۆڕەکۆمەڵایەتییەکان بڵاوبووەتەوە، دەرکەوتنی ئەو ماسییەش بە تەواوی ترسی لای دانیشتووانی وڵاتەکانی ئەو ناوچەیە بە گشتی و چیلی بە تایبەتی دروستکردووە".

دەرکەوتنی ئەو ماسییە واتای روودانی بومەلەرزەی بەهێز و دروستبوونی تسۆنامییە لە داهاتوویەکی نزیکدا

باسیلەوەشکرد:" هۆکاری ترسەکەی هاوڵاتییان دەگەڕێتەوە بۆ بوونی ئەفسانەیەکی ژاپۆنی سەبارەت بەو ماسییە کە دەڵێت، دەرکەوتنی ئەو ماسییە واتای روودانی بومەلەرزەی بەهێز و دروستبوونی تسۆنامییە لە داهاتوویەکی نزیکدا".

لە رابردوودا پێش روودانی بومەلەرزە و دروستبوونی تسۆنامی لە یابان، ئیندۆنیزیا، چیلی و فلیپین ماسیی ناوبراو لە ناوچەکاندا بینراوە

ماڵپەرە ئەمەریکییەکە ئەوەشیخستووەتەڕوو:" ماسییەکە ناوی ریوگو نۆ تسوکایە، باسلەوەدەکرێت، لە رابردوودا پێش روودانی بومەلەرزە و دروستبوونی تسۆنامی لە یابان، ئیندۆنیزیا، چیلی و فلیپین ماسیی ناوبراو لە ناوچەکاندا بینراوە، بەڵام پسپۆڕان ئەو بابەتەیان رەتکردەوە و رایانگەیاند، ئەوە تەنها ئەفسانەیەکی ئاساییە و ماسییەکە هیچ پەیوەندییەکی بە رووداوە سروشتییەکانەوە نییە، ئەگەر لە دوای دەرکەوتنی ئەو ماسییەش رووداوێکی سروشتی روویدابێت ئەوە تەنها رێکەوت بووە".